विजापूर शहराच्या बाहेर असलेल्या बसंतवन येथे इन्फोसिस फाउंडेशनच्या प्रमुख आणि राज्यसभा सदस्य सुधा मूर्ती यांनी भेट देऊन, ८५ फूट उंच शिव मूर्तीचे दर्शन घेतले.

एका कार्यक्रमाच्या निमित्ताने विजापूर शहरात आलेल्या सुधा मूर्ती यांनी शिवगिरीला भेट दिली. यावेळी त्यांनी मंदस्मित करणाऱ्या ८५ फूट उंच शिवशंकराच्या मूर्तीचे दर्शन घेतले. तसेच, मूर्तीच्या बांधकाम कार्याची माहिती त्यांनी जाणून घेतली.

बसंतवनमधील ‘सस्यकाशी’ या विविध प्रकारच्या वनस्पतींची हिरवीगार वनराई पाहून त्यांनी आनंद व्यक्त केला. यावेळी सुधा मूर्ती यांनी शिवाला विशेष पूजा अर्पण केली. शिवगिरी येथे सुरू असलेल्या धार्मिक आणि सामाजिक सेवा कार्यांची त्यांनी प्रशंसा केली. यावेळी शिवगिरी ट्रस्टतर्फे श्रीमती आरती पाटील यांनी ट्रस्टच्या अन्नदान, पर्यावरण संरक्षण आणि गो-रक्षण या कार्यांची सविस्तर माहिती दिली.

यावेळी बोलताना सुधा मूर्ती यांनी, “शिवगिरी येथील शिवप्रतिमा पाहून आनंद झाला असून, ट्रस्टने सेवाभावी कार्ये यापुढेही सुरू ठेवावीत,” अशी सदिच्छा व्यक्त केली. यावेळी शिवगिरीचे अर्चक रुद्रय्या हिरेमठ आणि ट्रस्टचे सदस्य उपस्थित होते