बेळगाव येथील शिवबसवनगरमधील कारंजीमठच्या शिवानुभव मंडपात सोमवार, ६ ऑक्टोबर २०२५ रोजी शिवानुभव आणि हनगल श्री कुमार शिवयोगी यांच्या जयंतीचा कार्यक्रम आयोजित करण्यात आला आहे. या कार्यक्रमात विशेष प्रवचन, संगीत क्षेत्रातील कलाकारांचा सत्कार आणि सांस्कृतिक कार्यक्रम होणार आहेत.

हा धार्मिक आणि सांस्कृतिक कार्यक्रम पूज्य श्री म. नि. प्र. गुरुसिद्ध महास्वामीजी यांच्या पवित्र सानिध्यात पार पडणार आहे. यावेळी डॉ. शिवयोगी देवरू यांची विशेष उपस्थिती असणार आहे. कार्यक्रमाचे मुख्य आकर्षण म्हणजे ‘हनगल श्री कुमार शिवयोगी’ या विषयावरचे विशेष व्याख्यान. हे व्याख्यान चिंचणी येथील अल्लमप्रभु सिद्धसंस्थानमठाचे नूतन उत्तराधिकारी पूज्य श्री शिवप्रसाद देवरू देणार आहेत. कार्यक्रमाच्या अध्यक्षस्थानी श्री मिथुन अंकली असतील.

यावेळी संगीत क्षेत्रात उल्लेखनीय यश संपादन केलेल्या दोन युवा कलाकारांचा मठाच्या वतीने गौरव सत्कार करण्यात येणार आहे. यामध्ये कु. प्रणव विनायक आणि वेदप्रकाश यांचा समावेश आहे. सत्काराच्या सोहळ्यानंतर त्यांचे विशेष संगीत कार्यक्रमही आयोजित करण्यात आले आहे. कार्यक्रमाची सुरुवात कारंजीमठाच्या कुमारेश्वर संगीत पाठशाळेच्या मुलांच्या प्रार्थनेने होईल, अशी माहिती मठ प्रशासनाने प्रसिद्धीपत्रकाद्वारे दिली आहे.