बेळगावमध्ये आयोजित श्री दुर्गामाता दौड केवळ देव, देश आणि धर्म याविषयी जनजागृती करत नाही, तर युवा पिढीला व्यसनांपासून मुक्त करून सशक्त समाज निर्माण करण्यासाठीही जागरूकता निर्माण करण्याचे कार्य करत आहे, ज्यामुळे ही दौड युवा पिढीसाठी मार्गदर्शक ठरत आहे.

नवरात्रीच्या आठव्या दिवशी महागौरीची आराधना करून बेळगावात श्री दुर्गामाता दौड मोठ्या उत्साहात आणि आनंदात पार पडली. छत्रपती शिवाजी महाराज उद्यानात शिवछत्रपतींच्या मूर्तीची पूजा करून प्रेरणा मंत्रासह ध्वजारोहण करण्यात आले आणि दौडला सुरुवात झाली.

दौड डॉ. श्यामा प्रसाद मुखर्जी रस्ता, कपिलेश्वर उड्डाणपूल, स्टेशन रोड, हेमू कलानी चौक या मार्गावरून पुढे सरकली. यावेळी धारकरी असलेल्या तरुणांवर पुष्पवृष्टी करून आणि आरती ओवाळून दौडचे स्वागत करण्यात आले.

दौडमध्ये बोलताना हृदयरोगतज्ज्ञ डॉ. एम.डी. दीक्षित यांनी मार्गदर्शन केले.

“आधुनिक जीवनशैली, खाण्याच्या सवयी आणि नियमित व्यायामाद्वारे आरोग्य जपावे. व्यसने सोडून निर्व्यसनी व्हावे आणि छत्रपती शिवाजी महाराज तसेच धर्मवीर छत्रपती संभाजी महाराजांकडून प्रेरणा घेऊन आरोग्यपूर्ण समाजाची निर्मिती करावी. द्वेष आणि क्लेश विसरून तणावाच्या जीवनातून बाहेर पडावे, ज्यामुळे हृदयविकारासारख्या समस्यांपासून दूर राहता येईल. मोबाईल आणि टीव्ही पाहण्यात व्यग्र राहून झोपेचा त्याग करू नये. युवा पिढीने निरोगी राहावे आणि वर्षातून एकदा आपल्या हृदयाची तपासणी करावी.” असे त्यांनी म्हटले.

दौड रामलिंगखिंड गल्लीमार्गे जत्तीमठ येथे पोहोचली. तेथे ध्येय मंत्रासह पूजा करून, ध्वजावतरण करून आजच्या दौडची सांगता करण्यात आली. उद्या, ३० सप्टेंबर रोजी मंगळवारी, श्री दुर्गामाता दौड टिळकवाडीतील छत्रपती शिवाजी कॉलनीतून सुरू होईल आणि अनगोळमधील लक्ष्मी मंदिराजवळ तिचा समारोप होईल.