बेंगळुरू येथील शिवाजीनगर मेट्रो स्थानकाचे नाव बदलून ‘सेंट मेरी’ असे करण्याच्या सरकारच्या निर्णयाचा निषेध करत, श्री राम सेना हिंदुस्थान संघटनेने बेळगावमध्ये आंदोलन केले. यावेळी संघटनेने जिल्हाधिकाऱ्यांमार्फत सरकारला निवेदन सादर करत तातडीने हा निर्णय मागे घेण्याची मागणी केली.

बेंगळुरू येथील शिवाजीनगर मेट्रो स्थानकाचे ‘सेंट मेरी मेट्रो स्टेशन’ असे नामकरण करण्याच्या सरकारच्या निर्णयाचा निषेध करण्यासाठी सोमवारी श्री राम सेना हिंदुस्थान संघटनेने आंदोलन केले आणि जिल्हाधिकाऱ्यांकडे निवेदन सादर केले.

यावेळी श्री राम सेना हिंदुस्थानचे रामाकांत कोंडुस्कर म्हणाले, “बेंगळुरूच्या शिवाजीनगर मेट्रो स्थानकाचे नाव सेंट मेरी ठेवण्यासाठी मुख्यमंत्र्यांनी नुकत्याच सादर केलेल्या प्रस्तावाचा आम्ही विरोध करतो. ‘शिवाजीनगर’ हे नाव कर्नाटक आणि संपूर्ण देशभरातील लाखो लोकांचे श्रद्धास्थान असलेल्या छत्रपती शिवाजी महाराजांच्या अद्भुत परंपरेशी थेट संबंधित आहे. त्यामुळे या स्थानकाचे नाव कोणत्याही परिस्थितीत बदलू नये.”

“स्वराज्यासाठी, न्यायासाठी आणि सर्व धर्मांसाठी लढलेल्या या महान मराठा योद्ध्याचा सन्मान राखला जावा आणि शिवाजीनगर परिसराची सांस्कृतिक आणि ऐतिहासिक ओळख जपली जावी. अनावश्यक वाद निर्माण करण्याऐवजी, एका राष्ट्रीय प्रेरणास्थानाच्या नावाने भावी पिढ्यांना प्रेरणा द्यावी,” अशी मागणी कोंडुस्कर यांनी केली.