बेळगाव जिल्हा पोलिसांच्या नेतृत्वाखालील एका विशेष पथकाने मोटरसायकल चोरीच्या एका मोठ्या टोळीचा पर्दाफाश केला आहे.

एका तक्रारीवरून सुरू झालेल्या तपासात, पोलिसांनी कारवाई करून दोन आरोपींना अटक केली असून, त्यांच्याकडून तब्बल १२ चोरीच्या मोटरसायकल हस्तगत करण्यात आल्या आहेत. जप्त करण्यात आलेल्या या मोटरसायकलची अंदाजे किंमत ८,१५,००० रुपये इतकी आहे.

रायबाग तालुक्यातील कुडची येथील अमजदखान शब्बीर मुजावर यांनी हारुगेरी पोलीस ठाण्यात मोटरसायकल चोरीप्रकरणी तक्रार दाखल केली होती. यानुसार कारवाई करत बेळगाव जिल्ह्याचे पोलीस अधीक्षक भीमाशंकर गुळेद यांच्या मार्गदर्शनाखाली, बेळगाव जिल्ह्याचे अतिरिक्त पोलीस अधीक्षक आर.बी. बसरगी, अथणी उपविभागाचे पोलीस उपाधीक्षक प्रशांत मुन्नोळी आणि हारुगेरी सर्कलचे सीपीआय रतनकुमार जिरग्याळ यांच्या देखरेखीखाली हारुगेरी पोलीस ठाण्याचे पीएसआय माळप्पा पुजारी यांच्या नेतृत्वाखालील पथकाने दोन आरोपींना अटक केली.

या तपास पथकाचे नेतृत्व पीएसआय माळप्पा पुजारी, हारुगेरी पोलीस ठाणे यांनी केले. त्यांच्यासह पथकात अशोक ए. शांडगे, रमेश मुदिनमनी, बसवराज होसट्टी, हनुमंत आर. अंबी, जी.एन. कागवाड, प्रकाश सप्तसागरे, सुरेश हूगार आणि बेळगाव येथील पोलीस अधीक्षक कार्यालयातील तांत्रिक विभागाचे विनोद चिक्कन्नवर यांचा समावेश होता. या यशस्वी कामगिरीबद्दल बेळगाव जिल्ह्याच्या पोलीस अधीक्षकांनी सर्व पोलीस अधिकारी आणि कर्मचाऱ्यांचे कौतुक केले.