लिंगायत मठाधीशांचे संघटन, जागतिक लिंगायत महासभा, शरण साहित्य परिषद, राष्ट्रीय बसव दल आणि इतर लिंगायत संघटनांच्या संयुक्त विद्यमाने आयोजित बसव संस्कृती अभियानाअंतर्गत शहरात भव्य शोभायात्रा काढण्यात आली. या शोभायात्रेने १२ व्या शतकातील बसवण्णांचा इतिहास नागरिकांसमोर पुन्हा एकदा जिवंत केला.

विविध पारंपरिक वाद्यमेळांचे सूर आणि शोभायात्रेत सहभागी झालेल्या बसवभक्तांचा जनसागर यामुळे शहराला उत्साही वातावरण प्राप्त झाले होते. ही शोभायात्रा बेळगावातील लिंगराज महाविद्यालय मैदानावरून सुरू झाली. शोभायात्रेमध्ये १२ व्या शतकातील बसवण्णांचा इतिहास सांगणाऱ्या अनुभव मंटपाने विशेष लक्ष वेधून घेतले. ही शोभायात्रा कॉलेज रोड, चन्नम्मा सर्कल, डॉ. बी.आर. आंबेडकर उद्यान, बीम्स रुग्णालय, कोल्हापूर सर्कल आणि के.एल.ई. रस्त्याने जाऊन शेवटी शिवबसव नगर येथील आर.एन. शेट्टी तंत्रज्ञान महाविद्यालयात थांबली.

यावेळी, गदग येथील तोण्टदार्य मठाचे जगद्गुरू डॉ. तोण्टद सिद्धराम स्वामी म्हणाले, “बसव रथयात्रा बेळगावात दाखल झाली आहे. बेळगावातील नागरिकांनी या रथाचे मोठ्या उत्साहाने स्वागत केले आहे. बसव संस्कृती अभियानाचा मुख्य उद्देश समाजात समानता आणणे आणि जात, धर्म, पंथ व लिंगभेद नष्ट करणे हा आहे.”

या शोभायात्रेत माते वाग्देवी, डॉ. पंडिताराध्य शिवाचार्य स्वामी, नाडोज डॉ. बसवलिंग पट्टद्देवर, नागानूर रुद्राक्षी मठाचे डॉ. अल्लमप्रभू स्वामी, बसवगुरुकुल स्वामी, यमकनमर्डीचे सिद्धबसव स्वामी, धारवाडचे बसवानंद श्री, बेळगावच्या माता कुमुदिनी, शेगुणसी विरक्त मठाचे शंकर स्वामी, अरभावीचे गुरुबसव लिंग स्वामी, अथणी मटगी मठाचे प्रभू चन्नबसव स्वामी यांच्यासह अनेक मठाधीश आणि बसवभक्त सहभागी झाले होते.