जय किसान खासगी भाजी मार्केट बंद करण्याच्या बुडाच्या निर्णयाला महापालिकेनेही पाठिंबा देऊ नये, अशी विनंती करण्यासाठी जय किसान भाजी मार्केटचे व्यापारी बेळगावच्या महापौरांना भेटले. सणासुदीच्या काळात कोणताही वाद निर्माण न करण्याचे आणि बेळगावच्या शेतकऱ्यांना पाठिंबा देण्याचे आवाहनही त्यांनी केले. महापौर मंगेश पवार यांची भेट घेण्यासाठी विरोधी पक्ष नगरसेवक मुझम्मिल ढोणी यांच्या नेतृत्वाखाली जय किसान खासगी भाजी मार्केटचे व्यापारी महापालिकेत पोहोचले होते. त्यांनी कोणत्याही परिस्थितीत जय किसान भाजी मार्केट बंद करू नये, अशी मागणी केली.

यावेळी व्यापारी सिद्धगौडा मोदगी यांनी जोरदार आक्षेप नोंदवला. “सिद्धगौडा मोदगी हे शेतकरी नाहीत, तरीही ते विनाकारण आम्हाला त्रास देत आहेत. एपीएमसी मार्केट बंद करण्याचा प्रयत्न कोणीही करत नाही. शेतकऱ्यांसाठी दोन्ही बाजारपेठांची गरज आहे. जे शेतकरी नाहीत असे काही व्यापारी त्रास देत आहेत. खासगी भाजी मार्केट बंद करू नये, अशी मागणी शेतकऱ्यांनी केली,” असे सांगत, “देशात खासगी शाळा आणि खासगी रुग्णालये आहेत, तर खासगी भाजी मार्केट का नसावे?” असा प्रश्नही त्यांनी विचारला.

यावेळी मुझम्मिल ढोणी म्हणाले की, “उच्च न्यायालयाच्या आदेशानुसार एका समितीने तपासणी करून जय किसान भाजी मार्केटला परवानगी दिली आहे. तरीही काही लोक विनाकारण याला अनधिकृत बाजारपेठ म्हणत आहेत. गणेशोत्सव आणि ईद मिलादच्या काळात हा वाद निर्माण करण्याचा प्रयत्न केला जात आहे. बुडाने ज्याप्रकारे घाईघाईत निर्णय घेतला, त्याचप्रकारे महापालिकेने कोणताही निर्णय घेण्याआधी योग्य तपासणी करावी.” यावर महापौर मंगेश पवार म्हणाले की, “याबाबत कायदेशीर सल्ला घेऊनच कार्यवाही केली जाईल. दोन भाजी मार्केट असतील तर ते शेतकऱ्यांसाठी फायद्याचेच आहे.” यावेळी जय किसान भाजी मार्केटचे अनेक व्यापारी उपस्थित होते.