बेळगाव तालुक्यामधील हिरेबागेवाडीजवळ असलेल्या बडॅकौळ मठाच्या घाटात एक भीषण अपघात घडला आहे. हुबळीहून पुण्याच्या दिशेने निघालेली ‘गोगटे’ नावाची बस पलटी झाल्याने दोन प्रवाशांचा जागीच मृत्यू झाला.

हा अपघात आज सकाळी पुणे-बेंगळुरू राष्ट्रीय महामार्ग क्रमांक ४ वर घडला. चालकाच्या निष्काळजीपणामुळे हा अपघात झाल्याचे म्हटले जात आहे. अपघात झाला त्यावेळी बसमध्ये एकूण १२ प्रवासी प्रवास करत होते. यामध्ये एका महिला प्रवाशाचा आणि एका पुरुष प्रवाशाचा मृत्यू झाल्याचे सांगण्यात येत आहे. अपघाताच्या तीव्रतेमुळे बसवरील नियंत्रण सुटले आणि बस पलटी झाली, ज्यामुळे अनेक प्रवासी बसमध्ये अडकून पडले.

स्थानिक नागरिक आणि हिरेबागेवाडी पोलिस ठाण्याचे कर्मचारी तात्काळ घटनास्थळी दाखल झाले. त्यांनी सुमारे नऊ लोकांचे प्राण वाचवण्यात यश मिळवले. जखमींना तात्काळ स्थानिक रुग्णालयात दाखल करण्यात आले आहे. गंभीर जखमींना मात्र बेळगावमधील बीम्स रुग्णालयात हलवण्यात आले आहे.