बेळगाव महानगरपालिकेत रस्त्यावरील विक्रेत्यांकडून अधिक ‘भूभाडे’ वसूल केले जात असल्याच्या विरोधात विरोधी पक्षाच्या सदस्यांनी जोरदार आवाज उठवला. यावरून सत्ताधारी आणि विरोधक यांच्यात बरीच चर्चा झाली. यावेळी विरोधकांनी जास्त भूभाडे वसूल करणाऱ्यांविरोधात एफआयआर दाखल करण्याची परवानगी देण्याची मागणी केली.  महापौर मंगेश पवार यांच्या अध्यक्षतेखाली महानगरपालिकेची सर्वसाधारण सभा सुरू झाली. सभेच्या सुरुवातीलाच ‘भूभाडे’ आणि नवीन स्वच्छता कर्मचारी पॅकेजच्या विषयावर चर्चा सुरू झाली. विरोधी पक्षाच्या सदस्यांनी या विषयांना पुढील बैठकीत चर्चेसाठी ठेवावे अशी मागणी केली. त्यावेळी सत्ताधारी पक्षाचे नेते हनुमंत कोंगली सभागृहात उपस्थित असूनही, सदस्य रवी धोत्रे यांनी विरोध केला. यावर, ‘यामध्ये काहीतरी लपवले जात आहे आणि घाईघाईने याला मंजुरी दिली जात आहे’, असे विरोधी पक्षाचे सदस्य शाहीदखान पठाण, मुजम्मिल ढोणी आणि अझीम पटवेगार यांनी म्हटले.

यावर सत्ताधारी पक्षाचे नेते हनुमंत कोंगाळी चर्चेला तयार असल्याचे सांगत असतानाच सत्ताधारी पक्षाचे सदस्य रवी धोत्रे यांनी ‘तुम्ही का बोलताय? तुमचे नेते कुठे आहेत?’ असा प्रश्न केला. यामुळे संतापलेल्या विरोधी पक्षाच्या सदस्यांनी ‘विरोधी पक्षनेते सोहेल संगोल्ली सुट्टीवर असल्याची माहिती महापौरांना आधीच दिली आहे. आमच्या नेत्यांबद्दल विचारण्याचा यांना काय अधिकार? आम्हाला ‘रूलिंग’ देणारे रवी धोत्रे कोण? महापौरांनी याचे उत्तर द्यावे’, अशी मागणी केली.  ‘आम्ही चर्चा करण्यास तयार आहोत. जर काही सूचना असतील, तर त्या याच सभेत द्या. त्यावर पुढील बैठकीपर्यंत कारवाई केली जाईल’, असे आयुक्त शुभा बी. यांनी सांगितले.

‘बेळगावातील व्हेंडर झोनमध्येही का भूभाडे घेतले जात आहे?’ असा प्रश्न विरोधी सदस्य मुजम्मिल ढोणी यांनी विचारला. त्यावर महानगरपालिकेच्या आयुक्तांनी, ‘बेळगावमध्ये ४ ठिकाणी व्हेंडर झोन तयार करण्याचे न्यायालयाचे आदेश आहेत. सध्या कोतवाल गल्ली आणि नरगुंदकर भावे चौक हे दोन परिसर निश्चित केले आहेत. उर्वरित दोन जागा अजून निश्चित करायच्या आहेत. इथे मूलभूत सुविधा दिल्यानंतरच भूभाड्यामध्ये सूट दिली जाईल’, असे सांगितले. यावर सत्ताधारी पक्षाचे नेते हनुमंत कोंगाळी यांनी ‘त्यांची निवडणूक होऊन त्यांची कार्यकारिणी स्थापन होत नाही, तोपर्यंत भूभाड्यात सूट देणे शक्य नाही’, असे म्हटले.

विरोधी सदस्य अझीम पटवेगार यांनी, ‘महानगरपालिकेच्या दुकानांना नसलेले भाडे रस्त्यावरील विक्रेत्यांकडून का घेतले जात आहे?’ असा प्रश्न विचारला. त्यांनी नियमांचे उल्लंघन करून कंत्राटदार आपल्या मनानुसार भाडे घेत असल्याचा आरोप केला. ‘बळजबरीने पैसे वसूल करणाऱ्यांवर एफआयआर दाखल करण्याची परवानगी द्यावी आणि गरिबांकडून दिवसाला १०० रुपये भाडे घेणे त्वरित थांबवावे’, अशी मागणी त्यांनी केली.

‘महानगरपालिकेने भूभाड्याबद्दल प्रमुख रस्त्यांवर फलक लावावे, किंवा नगरसेवक आणि अधिकाऱ्यांनी माहिती द्यावी’, अशी सूचना विधान परिषद सदस्य साबण्णा तळवार यांनी केली.