बेळगाव इन्स्टिट्यूट ऑफ मेडिकल सायन्सेस संचालक अशोक शेट्टी यांनी दिलेल्या माहितीनुसार, बेळगावमधील सुपर स्पेशालिटी हॉस्पिटल गेल्या चार महिन्यांपासून सुरू आहे. बळ्ळारीहून एका वरिष्ठ न्यूरो सर्जनची बेळगावला बदली झाली आहे, असे त्यांनी माध्यमांशी बोलताना सांगितले.

गेल्या चार महिन्यांपासून सुपर स्पेशालिटी हॉस्पिटलचे काम सुरू आहे. येत्या दहा दिवसांत कॅथलाग विभागही सुरू होईल. सध्या कार्डिओलॉजिस्टकडून ओपीडी चालवली जात आहे. बळ्ळारीहून एका वरिष्ठ न्यूरो सर्जनची बदली झाली आहे. न्यूरो सर्जरी विभागात दोन सहायक प्राध्यापक कार्यरत आहेत. प्लॅस्टिक सर्जरी आणि न्यूरो फिजिशियन वगळता इतर सर्व उपचार सुरू झाले आहेत, असे अशोक शेट्टी म्हणाले.

“बॅकलॉग पदांच्या भरतीसाठी सरकारी पातळीवर प्रक्रिया सुरू आहे. ती पूर्ण झाल्यावर कायमस्वरूपी नियुक्तीची परवानगी मिळेल. सध्या तात्पुरत्या कर्मचाऱ्यांची नेमणूक करण्यात आली आहे. काही प्राध्यापक आणि सहयोगी प्राध्यापक रुजू झाले आहेत. कायमस्वरूपी नियुक्ती झाल्यास डॉक्टर येतील कारण सुपर स्पेशालिटी रुग्णालयात चांगले वेतन मिळते. केएलई मेडिकल ऑफिसर आणि प्रभाकर कोरे यांनी बेळगावच्या सुपर स्पेशालिटी रुग्णालयात कायमस्वरूपी नियुक्ती होईपर्यंत त्यांच्या संस्थेतील डॉक्टरांना विनामूल्य सेवा देण्यासाठी सरकारी मुख्य सचिवांना पत्र लिहिले आहे. मुख्य सचिवांनी ते पत्र आरोग्य विभागाच्या सचिवांकडे पाठवले आहे. आरोग्य सचिव आणि आरोग्य मंत्र्यांनी चर्चा करून, काही अटी घालून, कायमस्वरूपी डॉक्टरांची नियुक्ती होईपर्यंत ओपीडी आणि आयपीडीसाठी त्यांच्या सेवेचा वापर करण्यासाठी करार करण्याचे पत्र लिहिले आहे,” असे अशोक शेट्टी म्हणाले.

अशोक शेट्टी यांनी पुढे सांगितले की, प्रशासकीय बाबींमुळे आज होणारा करार सोमवारी होईल. करारातील अटींनुसार प्रशासकीय बाबींमध्ये हस्तक्षेप केला जाणार नाही.