श्रावण महिन्याच्या पहिल्या सोमवारी विजापूर येथील मंदिरे भक्तांनी गजबजून गेली होती. विजापुरात अनेक मंदिरांमध्ये श्रावण सोमवारनिमित्त विविध धार्मिक विधींचे आयोजन करण्यात आले होते.

हिंदू धर्मात अत्यंत पवित्र मानल्या जाणाऱ्या श्रावण महिन्यात भगवान शंकराची विशेष आराधना केली जाते. शिवाच्या उपासनेसाठी हा काळ अत्यंत महत्त्वाचा असून, महामृत्युंजय मंत्राचा जप करणे शुभ मानले जाते. श्रावणी सोमवारी उपवास आणि शिवपूजा विशेष फलदायी मानली जाते. याच निमित्ताने विजापूर शहराबाहेर असलेल्या शिवगिरी येथे विविध धार्मिक विधी उत्साहात पार पडले. चित्रपट निर्माता बसंती कुमार पाटील यांच्या अध्यक्षतेखालील टी.के. पाटील बेनकाट्टी चॅरिटेबल ट्रस्टने येथे ८५ फूट उंचीची स्थापन केलेली भव्य शिवप्रतिमा भक्तांसाठी एक महत्त्वाचे श्रद्धास्थान बनली आहे. दररोज शेकडो भक्त येथे येऊन शिवाचे दर्शन घेतात. हिरव्यागार निसर्गात या शिवप्रतिमेचे विहंगम दृश्य पाहणे हा एक अलौकिक अनुभव असतो. येथे दररोज अन्नदान आणि भक्ती दासोह चालवले जाते. श्रावणी सोमवारच्या विशेष दिवशी शिवलिंगाला रुद्राभिषेक, पंचफळाभिषेक, बुत्ती पूजा आणि इतर विविध आकर्षक पूजा आयोजिण्यात येतात अशी माहिती पुजारी रुद्रय्या स्वामी यांनी दिली.

शिवगिरी येथे ‘बुत्ती पूजा’ नावाची एक विशिष्ट पूजा केली जाते. शिवासाठी बुत्ती पूजा केल्याने भक्तांच्या मनोकामना पूर्ण होतात, तसेच शिव-पार्वती देवी कुटुंबाला अष्टैश्वर्य प्रदान करतात अशी श्रद्धा असल्याने या पूजेला विशेष मागणी आहे. शिवलिंगाला भात आणि दह्याने लेप लावून, त्यावर डाळिंबाच्या दाण्यांनी आरास करण्यालाच बुत्ती पूजा असे म्हणतात. बुत्ती पूजा करण्यापूर्वी रुद्राभिषेक, पंचाभिषेक करून नंतर अलंकार पूजा केली जाते. त्यानंतर भक्त आपल्या इच्छा पूर्ण करणाऱ्या शिवाला कृतज्ञता व्यक्त करतात. ही पूजा केवळ श्रावण महिन्यातच केली जाते हे आणखी एक वैशिष्ट्य आहे. यासंदर्भात येथील एका महिला भाविकाने दिलेली प्रतिक्रिया पाहुयात..

विजापूरमधील शिवभक्तांनी श्रावणातील पहिल्या सोमवारी ‘बुत्ती पूजा’ करून भगवान शंकराप्रति आपली निष्ठा व्यक्त केली. ही विशिष्ट पूजा केवळ श्रद्धेचे प्रतीक नसून, देवाची कृपा होते या विश्वासाने भक्तांच्या मनात एक विशेष स्थान टिकवून आहे