बेळगावचे डीसीपी रोहन जगदीश यांच्या बदलीपश्चात, नारायण बरमणी यांची बेळगावच्या नवीन डीसीपीपदी नियुक्ती करण्यात आली आहे.

रोहन जगदीश यांची बेळगावातून अन्यत्र बदली झाल्यानंतर, आता धारवाडचे अतिरिक्त पोलीस अधीक्षक असलेले नारायण बरमणी यांना बेळगावचे नवे डीसीपी म्हणून शासनाने आदेश जारी केले आहेत. विशेष म्हणजे, मागील वेळी बेळगावात झालेल्या काँग्रेसच्या मेळाव्यात मुख्यमंत्री सिद्धरामय्या यांनी हात दाखवल्याने नारायण बरमणी यांनी नाराजी व्यक्त करत स्वेच्छानिवृत्तीचा विचार केला होता.

त्यानंतर मुख्यमंत्री आणि गृहमंत्री यांच्यासोबत झालेल्या चर्चेनंतर ते पुन्हा सेवेत रुजू झाले होते. आता त्यांची पुन्हा बेळगावात डीसीपी म्हणून बदली झाली आहे. यापूर्वी बेळगावात सब-इन्स्पेक्टर असताना नारायण बरमणी हे ‘बेळगावचे सिंघम’ म्हणून ओळखले जात होते. ‘सिंघम’ म्हणून ओळखल्या जाणाऱ्या या अधिकाऱ्याच्या नियुक्तीमुळे शहरात गुन्हेगारी नियंत्रणात येईल अशी अपेक्षा नागरिकांना आहे. त्यांची यापूर्वीची कार्यपद्धती पाहता, आगामी काळात बेळगावात पोलिसांची कारवाई अधिक तीव्र होण्याची शक्यता वर्तवली जात आहे.