मुसळधार पावसामुळे बेळगाव जिल्ह्यातील कंग्राळी खुर्द गावातील काळाघटा नाला फुटून धोकादायक परिस्थिती निर्माण झाली आहे.

बेळगावमध्ये सध्या मुसळधार पाऊस सुरू आहे. परिणामी, जोरदार पावसामुळे बेळगाव जिल्ह्यातील कंग्राळी खुर्द गावातील काळाघटा नाला फुटला आहे. यामुळे शेतकऱ्यांना आपल्या शेतात जाण्यासाठीही अडचण निर्माण झाली आहे. नाला ओलांडण्यासाठी पूल असूनही, पावसाच्या जोरदार प्रवाहामुळे तोही पाण्याखाली गेला आहे. पूल ओलांडताना पाय घसरल्यास मार्कंडेय नदीत वाहून जाण्याचा धोका आहे.

गेल्या १० वर्षांपासून कंग्राळी ग्रामपंचायत आणि ग्रामस्थ या नाल्याची उंची वाढवण्याची मागणी जिल्हा प्रशासनाकडे करत आहेत, तरीही कोणत्याही आमदार किंवा खासदाराने याकडे लक्ष दिलेले नाही. सध्याचे आमदार नाल्याची उंची वाढवण्यासाठी निविदा मंजूर झाल्याचे सांगत आहेत, मात्र अद्याप काम सुरू न झाल्याने नागरिकांमध्ये संतापाचे वातावरण आहे.

कंग्राळी खुर्दचे माजी ग्रामपंचायत अध्यक्ष म्हणाले की, आम्ही गेल्या १० वर्षांपासून काळाघटा नाल्याच्या विकासासाठी प्रयत्न करत आहोत. यासंदर्भात आम्ही या मतदारसंघाच्या आमदार आणि राज्याच्या महिला व बालविकास मंत्री लक्ष्मी हेब्बाळकर यांनाही निवेदन दिले आहे. त्यांनीही नाल्याची उंची वाढवण्याचे आश्वासन दिले आहे. जिल्हा प्रशासनाने तात्काळ परिस्थितीचे गांभीर्य लक्षात घेऊन काळाघटा नाल्याची उंची वाढवावी, अशी स्थानिक शेतकऱ्यांची मागणी आहे.

या ग हटणेची माहिती मिळताच, एपीएमसी पोलीस आणि ग्रामपंचायत सदस्यांनी घटनास्थळी भेट देऊन पाहणी केली.