बेळगावच्या कॅम्प धोबी घाट परिसरात १८ लाख रुपये खर्चून एक सुसज्ज उद्यान आणि जलसंधारण प्रणाली उभारण्याच्या कामाला सुरुवात झाली आहे. उत्तर मतदारसंघाचे आमदार आसिफ सेठ यांच्या हस्ते या प्रकल्पाचे उद्घाटन करण्यात आले.

शहराच्या विकासाला चालना देण्यासाठी आणि पर्यावरणाचे रक्षण करण्यासाठी हा प्रकल्प महत्त्वाचा ठरणार आहे. नगर विकास प्राधिकरणाच्या निधीतून हे काम हाती घेण्यात आले आहे. या प्रकल्पाच्या माध्यमातून धोबी घाट परिसरातील नागरिकांना सुंदर उद्यान उपलब्ध होईल, तसेच भूजल पातळी वाढवण्यासाठी जलसंधारण प्रणाली उपयुक्त ठरेल.

यावेळी आमदार आसिफ सेठ यांनी ‘इन न्यूज’ला माहिती देताना सांगितले की, एमएलआयआरसीचे ब्रिगेडियर, छावणी मंडळाचे माजी सदस्य, सीईओ आणि इतर अधिकाऱ्यांनी जलसंधारणासाठी विशेष पुढाकार घेतला आहे. बुडा आयुक्तांसोबत चर्चा करून या प्रकल्पाची पाहणी करण्यात आली होती. मान्सून सुरू होण्यापूर्वी हे काम पूर्ण करण्याचे उद्दिष्ट ठेवण्यात आले आहे, जेणेकरून पावसाचे पाणी प्रभावीपणे साठवता येईल.

ब्रिगेडियर जॉयदीप मुखर्जी यांनी सांगितले की, जलसंधारण प्रणालीचा प्रयत्न यशस्वी झाला आहे. आता दुसऱ्या टप्प्यात आमदार, माजी सदस्य आणि अधिकाऱ्यांच्या सहकार्याने उद्यानाच्या बांधकामासाठी भूमीपूजन करण्यात आले आहे. लवकरच एक आकर्षक उद्यान येथे तयार होईल. लोकांनी हा परिसर स्वच्छ आणि सुंदर ठेवण्यासाठी सहकार्य करावे.

यावेळी ब्रिगेडियर जॉयदीप मुखर्जी, नगर विकास प्राधिकरणाचे अध्यक्ष शकील अहमद, छावणी मंडळाचे माजी सदस्य साजिद शेख, डॉ. राहिली शेख, अलाउद्दीन किल्लेदार, रिझवान बेपारी, छावणी मंडळाचे मुख्य कार्यकारी अधिकारी राजीव कुमार, कंत्राटदार आणि इतर मान्यवर उपस्थित होते.