धारवाड जिल्ह्यात पिण्याच्या पाण्यासाठी मलप्रभेचे पाणी तलावांमध्ये सोडले जात आहे. मात्र, शेतीसाठी पाणी वापरण्यास प्रशासनाने बंदी घातली आहे. पिके वाचवण्यासाठी शेतकऱ्यांनी पाच दिवस पाणी सोडण्याची मागणी केली आहे.

जिल्ह्यातील ग्रामीण भागातील १५ गावांना १७ बोअरवेलद्वारे पिण्याच्या पाण्याचा पुरवठा केला जात आहे. मलप्रभा नदीतून कालव्यांमध्ये पाणी सोडून तलाव भरण्याचे कामही सुरू आहे. जिल्ह्यातील ६८ तलावांपैकी ५५ तलावांमध्ये पाणी सोडण्यात येत आहे. यापैकी चार तलाव ७५ टक्के, तर ४३ तलाव ५० टक्के भरले आहेत. सहा तलावांमध्ये ५० टक्क्यांपेक्षा कमी पाणी असून, दोन तलावांमध्ये केवळ १ ते २५ टक्के पाणीसाठा आहे.

पिण्याच्या पाण्याची समस्या उद्भवू नये, यासाठी १६ नोव्हेंबरपासून मलप्रभा नदीच्या उजव्या आणि डाव्या कालव्यातून दहा दिवस पाणी सोडण्यात येत आहे. मात्र, या पाण्याचा वापर कोणत्याही परिस्थितीत शेतीसाठी करू नये, असे कडक आदेश प्रशासनाने दिल्याचे धारवाडच्या जिल्हाधिकारी स्नेहल आर. यांनी स्पष्ट केले.
या निर्णयामुळे शेतकऱ्यांमध्ये नाराजी आहे. खरीप आणि रब्बी या दोन्ही हंगामांत पावसाने साथ न दिल्याने शेतकऱ्यांनी कष्टाने पेरलेली पिके पाण्याअभावी संकटात आली आहेत. जनावरांच्या चाऱ्याचाही प्रश्न निर्माण झाला आहे. किमान पाच दिवस शेतीसाठी पाणी सोडल्यास रब्बी पिके वाचवता येतील आणि जनावरांसाठी चारा पिकवता येईल, अशी मागणी शेतकरी बसाप्पा शेट्टर यांनी केली.
एकीकडे पिण्याच्या पाण्यासाठी तलाव भरण्याचे प्रशासनाचे प्रयत्न सुरू आहेत, तर दुसरीकडे पिके वाचवण्यासाठी शेतकरी पाण्याची मागणी करत आहेत. प्रशासन शेतीसाठी पाणी सोडण्यास परवानगी देणार का, याकडे शेतकऱ्यांचे लक्ष लागले आहे.


Recent Comments