Vijayapura

विजापूरमध्ये उपलोकायुक्तांकडून तक्रारींची सुनावणी

Share

सार्वजनिक तक्रारींचा जलद निपटारा करून प्रशासकीय त्रुटी दूर करणे हे लोकायुक्त संस्थेचे प्रमुख उद्दिष्ट असल्याचे उपलोकायुक्त न्यायमूर्ती के. एन. फणींद्र यांनी सांगितले. विजापूरमध्ये आयोजित जिल्हास्तरीय तक्रार निवारण बैठकीत ते बोलत होते.

जिल्हा पंचायत सभागृहात झालेल्या या बैठकीत प्रलंबित तक्रारींच्या सुनावणीला प्राधान्य देण्यात आले. दोन दिवस सुनावणी घेऊन शक्य तिथे तक्रारींचे जागेवरच निराकरण करण्याचा प्रयत्न करण्यात येणार असल्याचे त्यांनी सांगितले.

अधिकाऱ्यांनी जबाबदारीने काम करून विधवा आणि वृद्धापकाळ निवृत्तिवेतनासह नागरिकांना आवश्यक सेवा देण्यास विलंब करू नये. प्रशासनात पारदर्शकता आणि लोकाभिमुख दृष्टिकोन ठेवावा, असे निर्देश त्यांनी दिले. नागरिकांनीही निराधार तक्रारी करण्याऐवजी आवश्यक कागदपत्रे आणि पुराव्यांसह तक्रारी दाखल कराव्यात. लोकायुक्तांच्या कार्यक्षेत्रात न येणाऱ्या प्रकरणांमध्ये योग्य कायदेशीर मार्गदर्शन केले जाईल, असे त्यांनी स्पष्ट केले.

जिल्हाधिकारी डॉ. आनंद के. यांनी, नागरिकांना तक्रारींसाठी बेंगळुरूला जावे लागू नये, यासाठी उपलोकायुक्त जिल्ह्यात येऊन स्थानिक पातळीवर सुनावणी घेत असल्याचे सांगितले. संबंधित अधिकाऱ्यांना तक्रारींच्या अनुपालन अहवालासह उपस्थित राहण्याच्या सूचना देण्यात आल्याचेही त्यांनी नमूद केले.

या बैठकीला वरिष्ठ दिवाणी न्यायाधीश अरविंद हागरगी, जिल्हा पंचायत मुख्य कार्यकारी अधिकारी आनंद प्रकाश मीना, लोकायुक्त पोलीस अधीक्षक महानिंग नंदगावी, उपविभागीय अधिकारी जुफिशान हक, अतिरिक्त जिल्हाधिकारी डॉ. औद्राम, प्रकाश वड्डर यांच्यासह विविध विभागांचे अधिकारी उपस्थित होते. यावेळी प्रलंबित तक्रारींची सुनावणी करण्यात आली.

Tags: