राष्ट्रीय कायदेविषयक जागृती कार्यक्रमांतर्गत बेळगावच्या मच्छे कॅम्पसमधील जैन अभियांत्रिकी महाविद्यालयात भारतीय रेडक्रॉस सोसायटी, बेळगाव यांच्या सहकार्याने एमबीए आणि एमसीएच्या विद्यार्थ्यांसाठी विशेष सत्राचे आयोजन करण्यात आले.

या कार्यक्रमात जिल्हा विधी सेवा प्राधिकरणाचे सदस्य सचिव के. एन. शिवकुमार, रेडक्रॉस सोसायटीच्या बंगळूर येथील राज्य संचालक डॉ. प्रिया पुराणिक आणि अॅड. प्रीती संदेश देसाई हे प्रमुख मार्गदर्शक म्हणून उपस्थित होते. के. एन. शिवकुमार यांनी पदव्युत्तर विद्यार्थ्यांना जागरूकता, हक्क आणि जबाबदाऱ्या यांसह विविध कायदेशीर बाबींची माहिती दिली. भविष्यातील व्यावसायिकांना व्यवसाय, तंत्रज्ञान आणि नागरी जीवनाशी संबंधित आवश्यक कायदेविषयक ज्ञान देणे हा या सत्राचा उद्देश होता.

भारतात दरवर्षी ९ नोव्हेंबर रोजी राष्ट्रीय विधी सेवा दिन साजरा केला जातो. १९८७ मध्ये मंजूर झालेल्या विधी सेवा प्राधिकरण कायद्याच्या अंमलबजावणीच्या स्मरणार्थ हा दिवस पाळला जातो. हा कायदा ९ नोव्हेंबर १९९५ रोजी लागू झाला असून, गरजू व्यक्तींना मोफत कायदेशीर मदत उपलब्ध करून देण्याची तरतूद त्यात आहे. जात, ओळख किंवा सामाजिक स्थानाचा भेद न करता सर्व नागरिकांना मोफत कायदेशीर मदत मिळण्याबाबत जागरूकता निर्माण करणे, कायदेविषयक साक्षरतेला प्रोत्साहन देणे आणि वंचित तसेच दुर्बल घटकांना न्याय मिळवून देणे हा या उपक्रमाचा मुख्य उद्देश असल्याचे शिवकुमार यांनी सांगितले.

कायदेविषयक जागरूकता ही केवळ सुविधा नसून, स्वतःचे हित जपण्यासाठी आणि प्रतिष्ठा टिकवण्यासाठी प्रत्येक व्यक्तीला सक्षम करणारा मूलभूत अधिकार आहे. विद्यार्थ्यांसह सर्व नागरिकांनी कायदेविषयक साक्षरतेचे महत्त्व ओळखून उपलब्ध कायदेशीर मदत यंत्रणेचा लाभ घ्यावा. कायदा आणि सर्वसामान्य नागरिकांमधील अंतर कमी करून सर्वांना न्याय मिळेल असा समताधिष्ठित समाज निर्माण करण्यासाठी प्रयत्न करणे आवश्यक असल्याचेही त्यांनी नमूद केले.

यावेळी महाविद्यालयाचे प्राचार्य व संचालक डॉ. जे. शिवकुमार, एमबीए आणि एमसीए विभागप्रमुख तसेच समन्वयक सुजय वाल्वेकर आणि सोनल पाटंगे उपस्थित होते. संवादात्मक पद्धतीने झालेल्या या सत्राचा समारोप एमबीए विभागाचे प्राध्यापक व विभागप्रमुख डॉ. एस. रोहितराज यांच्या आभारप्रदर्शनाने झाला.