बेळगाव येथील बसवेश्वर चौकात जगज्ज्योती बसवेश्वरांचा पुतळा झाकला जाईल अशा प्रकारे लावण्यात आलेले बेकायदेशीर फ्लेक्स आणि बॅनर तत्काळ हटवण्याच्या मागणीसाठी बसवप्रेमी संघटनांनी महानगरपालिका आयुक्तांना निवेदन सादर केले.

कर्नाटकचे सांस्कृतिक नायक जगज्ज्योती बसवेश्वर चौकातील उद्यानात नवीन भव्य पुतळ्याच्या अनावरणाची सर्व तयारी सुरू आहे. मात्र, उद्यानाच्या समोरील भागात बसवेश्वरांचा पुतळा दिसणार नाही अशा पद्धतीने खाजगी बॅनर, फ्लेक्स आणि कटआऊट्स ओळीने लावले असल्याने बसवप्रेमींमध्ये तीव्र असंतोष पसरला आहे. या अनधिकृत फ्लेक्समुळे उद्यानाचे नैसर्गिक सौंदर्य खराब होत असून बसवेश्वरांच्या पुतळ्याचा अवमान होत असल्याचे सांगत विविध बसवप्रेमी संघटनांच्या नेत्यांनी संताप व्यक्त केला.

यापूर्वीही याबाबत निवेदन देऊनही महानगरपालिकेने कोणतीही कारवाई केलेली नाही, असा आरोप शिष्टमंडळाने केला. त्यामुळे उद्यानाच्या आसपास कोणतेही फ्लेक्स-बॅनर लावू नयेत असे कडक आदेश तत्काळ काढावेत; अन्यथा शहरात लिंगायत आणि बसवप्रेमी संघटनांच्या महासंघातर्फे भव्य आंदोलन छेडले जाईल, असा स्पष्ट इशारा महानगरपालिकेला देण्यात आला.

यासंदर्भात बसवराज रोटी, शिवसिद्ध पाटील, मनोहर पुडककलकट्टी, अशोक मलगली आणि सुजीत मुळगुंद यांचा समावेश असलेल्या बसवप्रेमी संघटनांच्या महासंघाच्या शिष्टमंडळाने बेळगाव महानगरपालिका आयुक्तांना लेखी निवेदन दिले.