डीसीसी बँकेच्या नोकरभरतीत मध्यस्थ म्हणून पैशांची मागणी केल्याचा व्हिडिओ व्हायरल झाल्यानंतर निपाणीचे उपतहसीलदार अरुण श्रीखंडे यांच्याविरोधात निपाणी बसवेश्वर पोलीस ठाण्यात एफआयआर दाखल करण्यात आला आहे.

हालसिद्धनाथ साखर कारखान्यात आयोजित पत्रकार परिषदेत डीसीसी बँकेचे अध्यक्ष अण्णासाहेब जोल्ले यांनी ही माहिती दिली. भरतीत आपल्या नावाचा गैरवापर करून पैशांची मागणी केल्याचे व्हिडिओमध्ये दिसल्याने ही कारवाई करण्यात आल्याचे त्यांनी सांगितले.

डीसीसी बँकेतील नोकरभरती प्रक्रिया पूर्णपणे नियमानुसार आणि पारदर्शक पद्धतीने पार पडते, असे स्पष्ट करत अधिकृत अर्जांनंतर परीक्षा आणि मुलाखतीद्वारेच पात्र उमेदवारांची निवड केली जाते, असे अण्णासाहेब जोल्ले म्हणाले.

काही मध्यस्थ व एजंट उमेदवारांची फसवणूक करून पैसे लाटण्याचे काम करत असून, नोकरी इच्छुकांनी अशा कोणत्याही मध्यस्थांच्या भूलथापांना बळी पडू नये, असे आवाहन त्यांनी यावेळी केले.