धारवाडचे तहसीलदार सचिदानंद कुचनूर हे १ कोटी रुपयांच्या लाचेपैकी ५० लाख रुपयांचा पहिला हप्ता स्वीकारताना लोकायुक्त अधिकाऱ्यांच्या जाळ्यात रंगेहात पकडले गेले. धारवाड येथील केसीडी मैदानाजवळ बुधवारी रात्री ९.३० वाजेच्या सुमारास ही कारवाई करण्यात आली.

मुधोळ येथील महांतेश (मंजुनाथ) या डेव्हलपरने धारवाड तालुक्यातील यरिकोप्प येथे ३३ एकर जमीन खरेदी केली होती. या जमिनीवरील ‘अ’ खराब नोंद हटवून विकसनासाठीची कागदपत्रे दुरुस्त करून देण्यासाठी तहसीलदार सचिदानंद कुचनूर यांनी १ एकर जमीन आणि १ कोटी रुपये रोख रकमेची मागणी केली होती. यापूर्वी एडीएलआर (ADLR) यांनी काढलेला फोडीचा आदेश तहसीलदारांनी रद्द केला होता व या प्रकरणाचा प्रस्ताव आपल्याकडे ठेवला होता.

या लाचखोरीविरोधात डेव्हलपर महांतेश यांनी धारवाड लोकायुक्त पोलिसांत तक्रार दाखल केली होती. तक्रारीनुसार सापळा रचून ५० लाख रुपयांची रोख रक्कम स्वीकारताना तहसीलदारांना केसीडी मैदानाजवळ ताब्यात घेण्यात आले. लोकायुक्त एसपी सिद्धलिंगप्पा यांच्या नेतृत्वाखाली ही यशस्वी कारवाई पार पडली. “राज्यातील लाचखोरीविरोधातील ही एक अत्यंत मोठी आणि महत्त्वाची कारवाई आहे,” अशी माहिती लोकायुक्त एसपींनी माध्यमांशी बोलताना दिली.