बेळगाव पोलिसांकडून शहरातील कायदा-सुव्यवस्था अबाधित ठेवण्याचे नियोजन
बेळगावमध्ये आगामी गणेशोत्सवाच्या पार्श्वभूमीवर कायदा व सुव्यवस्था अबाधित राखण्यासाठी पोलीस प्रशासनाने कडक पावले उचलली आहेत. पोलीस आयुक्त प्रकाश निकम यांच्या उपस्थितीत गुन्हेगारी पार्श्वभूमी असलेल्या व्यक्तींची परेड घेण्यात आली असून शांतताभंग करणाऱ्यांवर कठोर कारवाई करण्याचा इशारा देण्यात आला आहे.

गणेशोत्सवादरम्यान कोणताही अनुचित प्रकार किंवा कायदा व सुव्यवस्थेचा प्रश्न निर्माण होऊ नये यासाठी बेळगाव पोलिसांनी पूर्वतयारी सुरू केली आहे. याचाच एक भाग म्हणून शनिवारी सकाळी पोलीस कवायत मैदानावर गुन्हेगारी पार्श्वभूमी असलेल्या संशयितांची परेड आयोजित करण्यात आली होती.

पोलीस आयुक्त प्रकाश निकम यांच्या नेतृत्वाखाली झालेल्या या परेडमध्ये शहरातील विविध पोलीस ठाण्यांच्या हद्दीतील १२५ हून अधिक संशयितांच्या सध्याच्या हालचालींचा आढावा घेण्यात आला. उत्सवाच्या काळात कोणत्याही बेकायदेशीर कृत्य किंवा कारवायांमध्ये सहभागी न होण्याबाबत यावेळी स्पष्ट निर्देश देण्यात आले.

मार्केट, माळमारुती, एपीएमसी, कॅम्प, ग्रामीण, शहापूर, उद्यमबाग आणि मारीहाळ पोलीस ठाण्यांच्या हद्दीतील संशयित या परेडला उपस्थित होते. सर्व पोलीस ठाण्यांच्या माध्यमातून संबंधित घटकांना पोलिसांकडून योग्य त्या सूचना देण्यात आल्या आहेत.

गणेशोत्सव शांततेत आणि सौहार्दाच्या वातावरणात पार पडावा, हा यामागचा मुख्य उद्देश आहे. सणाच्या काळात भीतीचे वातावरण निर्माण करणे, अवैध व्यवसाय किंवा जनतेला त्रास देण्याचे प्रकार घडल्यास संबंधितांवर कायदेशीर कारवाई केली जाईल, असे पोलीस प्रशासनाने स्पष्ट केले आहे.

उत्सवाच्या काळात शहरातील मुख्य रस्ते, गणेश मंडपे, मिरवणूक मार्ग आणि संवेदनशील भागांमध्ये अतिरिक्त पोलीस बंदोबस्त तैनात करण्यात येत आहे. संशयित हालचालींवर पोलीस बारीक लक्ष ठेवून असून स्थानिक पोलीस ठाण्यांना तत्काळ कारवाईचे निर्देश देण्यात आले आहेत.

गणेशोत्सवाच्या काळात कायदा व सुव्यवस्था राखण्यासाठी पोलीस प्रशासन सतर्क असल्याचे या कारवाईवरून स्पष्ट होत आहे. कोणताही घटक असो, कायदा हातात घेणाऱ्यांवर कडक कारवाई केली जाईल, असा संदेश पोलीस आयुक्त प्रकाश निकम यांनी दिला.