कर्नाटक राज्य सरकारी कर्मचारी संघातर्फे दहावी (SSLC) आणि बारावीच्या (PUC) गुणवंत विद्यार्थ्यांसाठी बेळगाव येथील कुमार गंधर्व रंगमंदिरात ‘प्रतिभा पुरस्कार-२०२६’ सोहळ्याचे आयोजन करण्यात आले होते.

आमदार आसिफ सेठ यांच्या अध्यक्षतेखाली आणि राज्याध्यक्ष सी. एस. षडाक्षरी यांच्या मार्गदर्शनाखाली गुणवंत विद्यार्थ्यांचा गौरव करण्यात आला.

या वेळी मनोगत व्यक्त करताना साहित्यिक अशोक हंचली म्हणाले, “देशाचे भवितव्य असलेल्या तरुण पिढीच्या मनात या मातीबद्दल आणि देशाबद्दल अपार प्रेम रुजले पाहिजे. देशासाठी जगणे आणि मरणे हाच आपला धर्म असला पाहिजे. ‘हा माझा देश, हे माझे कर्नाटक’ ही भावना विद्यार्थ्यांच्या मनातील पहिला मंत्र बनली पाहिजे.”

या सोहळ्याला संघाचे सरचिटणीस एस. बसवराजू, कार्याध्यक्ष शंभूगौडा एस., वरिष्ठ उपाध्यक्ष आर. मोहन कुमार, नागराज जुम्मण्णावर, सोमशेखरय्या, बेळगाव जिल्हाध्यक्ष बसवराज रायरवगोळ, चिक्कोडी शैक्षणिक जिल्हाध्यक्ष बी. ए. कुंभार यांच्यासह अनेक पदाधिकारी व कर्मचारी मोठ्या संख्येने उपस्थित होते.