खानापूर तालुक्यातील नांदगड आणि रायापूरच्या वाल्मीकी नगरसह विविध भागांत ‘गृहज्योति’ योजनेच्या फेरतपासणीचे काम वेगाने सुरू आहे. या वेळी पाच गॅरंटी योजना अंमलबजावणी प्राधिकरणाचे सदस्य बाबू हत्तरवाड यांनी कर्मचाऱ्यांसोबत घरोघरी जाऊन नागरिकांना आवश्यक कागदपत्रे सादर करण्याचे आवाहन केले.

कर्नाटक सरकारच्या पाच प्रमुख गॅरंटी योजनांपैकी एक असलेल्या ‘गृहज्योति’ योजनेच्या लाभार्थ्यांची छाननी प्रक्रिया तालुकाभर राबवली जात आहे. ग्रामीण भागातील महिला व नागरिक माहितीच्या अभावामुळे योजनेपासून वंचित राहू नयेत, यासाठी बाबू हत्तरवाड स्वतः मैदानात उतरले आहेत. तपासणीसाठी येणाऱ्या कर्मचाऱ्यांना योग्य कागदपत्रे देऊन सहकार्य करण्याचे आवाहन त्यांनी केले. त्यांच्या या तत्परतेचे स्थानिक नागरिकांकडून कौतुक केले जात आहे.