बेंगळुरू येथे अतिक्रमणे हटवण्यासाठी गेलेल्या महानगरपालिकेच्या अधिकारी आणि कर्मचाऱ्यांवर पथविक्रेते व संघटनांच्या सदस्यांनी अचानक हल्ला केला.

या घटनेत महिला अभियंत्यांवर पेपर स्प्रे मारून त्यांना मारहाण करण्यात आली असून, दोषींवर तातडीने कठोर कारवाई करण्याची मागणी पालिका कर्मचाऱ्यांनी केली आहे. बस स्थानकाजवळ पदपथावरील अतिक्रमण हटवण्याचे काम सुरू असताना हा प्रकार घडला. पथविक्रेत्यांनी पालिकेच्या दोन महिला अभियंत्यांसह जेसीबी चालक व ट्रॅक्टर मदतनिसाला प्लास्टिकच्या खुर्च्या आणि हेल्मेटने मारहाण केली.

या अमानुष घटनेचा तीव्र निषेध नोंदवत बेळगाव महानगरपालिकेच्या सर्व अधिकारी व कर्मचाऱ्यांनी नगरविकास खात्याच्या मुख्य सचिवांना निवेदन सादर केले. भविष्यात अशा कारवायांदरम्यान पालिकेच्या कर्मचाऱ्यांना अनिवार्यपणे पोलीस बंदोबस्त पुरवण्यात यावा, अशी मागणी या निवेदनात करण्यात आली आहे.

या वेळी यल्लेश बच्चलपुरी, श्रीकांत, सागर कांबळे, भारत कोलकार यांच्यासह इतर कर्मचारी उपस्थित होते.