अयोध्या येथील श्री राम मंदिराच्या दानपेटीतील निधीचा गैरव्यवहार झाल्याच्या आरोपाची सखोल चौकशी करण्यात यावी, अशी मागणी केपीसीसी प्रवक्ते एस. एम. पाटील गणीहार यांनी केली आहे. विजापूर शहरात आयोजित पत्रकार परिषदेत ते बोलत होते.

राम मंदिराच्या दानपेटीतील हजारो कोटी रुपयांचा गैरव्यवहार झाल्याचे आरोप होत असून, केंद्र सरकार आणि संबंधित ट्रस्टने यावर स्पष्टीकरण दिले पाहिजे, असे गणीहार म्हणाले. देशातील जनतेने या मंदिरासाठी देणग्या दिल्या असून, या पैशांच्या वापराबाबत पारदर्शक चौकशी झाली पाहिजे. तसेच काँग्रेस पक्षाने कधीही मंदिर उभारणीला विरोध केला नव्हता, असेही त्यांनी नमूद केले.

केवळ राजीनामे घेऊन हे प्रकरण थांबवू नये, तर मंदिर ट्रस्टचे अध्यक्ष, सचिव आणि संबंधित पदाधिकाऱ्यांवर कडक कायदेशीर कारवाई झाली पाहिजे, अशी मागणी त्यांनी केली. वक्फ संस्थांमध्ये बिगर-मुस्लिमांचा समावेश करण्याबाबत सरकार चर्चा करते, त्याच धर्तीवर हिंदू धार्मिक ट्रस्टमध्येही इतर समुदायाच्या लोकांना संधी देण्याबाबत चर्चा झाली पाहिजे, असे मत त्यांनी मांडले. या पत्रकार परिषदेला फयाज कलादगी यांच्यासह इतर काँग्रेस नेते उपस्थित होते.