बेळगाव ग्रामीण जिल्हा काँग्रेसचे अध्यक्ष विनय नावलगट्टी यांनी आपल्याला विधान परिषदेचे नामनिर्देशित सदस्य करण्यासाठी काँग्रेस हायकमांडकडे अधिकृतपणे मागणी केली आहे. पक्षातील आपल्या प्रदीर्घ सेवेची दखल घेऊन ही संधी दिली जावी, अशी विनंती त्यांनी केली.

पत्रकारांशी बोलताना विनय नावलगट्टी यांनी सांगितले की, त्यांनी विद्यार्थी दशेपासून काँग्रेस पक्षात प्रवेश करून युवक काँग्रेससह विविध आघाड्यांवर काम केले आहे. गेल्या १५ वर्षांपासून ते ग्रामीण जिल्हा काँग्रेस अध्यक्ष म्हणून पक्षाची धुरा सांभाळत असून या प्रदीर्घ सेवेचा विचार करून पक्षश्रेष्ठींनी त्यांना विधान परिषदेवर पाठवावे, अशी मागणी विनय नावलगट्टी यांनी केली.

बेळगावमध्ये काँग्रेस भवन उभारण्यासाठी आपण मोठे योगदान दिल्याचे विनय नावलगट्टी यांनी सांगितले. गेल्या चार दशकांत बेळगाव जिल्ह्यातील एकाही नेत्याला नामनिर्देशित कोट्यातून विधान परिषदेवर पाठवले गेलेले नाही. पक्षासाठी केलेल्या कष्टाची दखल घेऊन यावेळी आपल्याला निश्चितपणे संधी दिली जाईल, अशी आशा विनय नावलगट्टी यांनी व्यक्त केली.