वचन पितामह डॉ. फ. गु. हळकट्टी यांची जयंती आणि वचन साहित्य संरक्षण दिन बेळगाव येथे उत्साहात साजरा करण्यात आला. वचन साहित्याच्या जतनासाठी हळकट्टी यांनी केलेले कार्य आणि त्याग आजच्या समाजासाठी मोठी प्रेरणा आहे, असे प्रतिपादन नागनूर रुद्राक्षीमठाचे डॉ. अल्लमप्रभू स्वामीजी यांनी केले.

बेळगाव जिल्हा प्रशासन, जिल्हा पंचायत, कन्नड आणि संस्कृती विभाग तसेच महानगरपालिकेच्या संयुक्त विद्यमाने कुमार गंधर्व कला मंदिरात या कार्यक्रमाचे आयोजन करण्यात आले होते. या प्रसंगी स्वामीजींनी डॉ. फ. गु. हळकट्टी यांच्या जीवनसंघर्षाचा आणि साहित्यातील योगदानाचा गौरव केला.

“आपल्या समाजातील पूर्वजांचा त्याग आणि सेवा हेच आजच्या संपन्न समाजाचे मूळ आहे. असाच मोठा त्याग आणि सेवा करणारे डॉ. फ. गु. हळकट्टी हे अत्यंत श्रेष्ठ व्यक्तिमत्त्व होते. त्यांनी वचनांचे संशोधन आणि संरक्षणासाठी आपले संपूर्ण आयुष्य पणाला लावले,” असे नागनूर रुद्राक्षीमठाचे डॉ. अल्लमप्रभू स्वामीजी यांनी म्हटले.

या कार्यक्रमाला अतिरिक्त जिल्हाधिकारी विजयकुमार होनकेरी, कन्नड आणि संस्कृती विभागाच्या सहाय्यक संचालक विद्यावती भजंत्री, तसेच जागतिक लिंगायत महासभेचे जिल्हाध्यक्ष बसवराज रोट्टी यांच्यासह इतर मान्यवर उपस्थित होते. उपस्थित सर्व मान्यवरांनी वचन पितामहांच्या प्रतिमेला पुष्पहार अर्पण करून अभिवादन केले.