बेळगाव मध्ये किरकोळ फार्मसी मालकांनी आपल्या व्यवसायाच्या संरक्षणासाठी एक भव्य निषेध मोर्चा काढला आहे. जिल्हाधिकाऱ्यांमार्फत मुख्यमंत्र्यांना महत्त्वाचे निवेदन सादर करून आंदोलनकर्त्यांनी आपल्या मागण्या तात्काळ पूर्ण करण्याची मागणी केली आहे.

बेळगाव जिल्हा रिटेल फार्मसी असोसिएशनच्या नेतृत्वाखाली शहरात या भव्य निषेध मोर्चाचे आयोजन करण्यात आले होते. संघटनेचे अध्यक्ष बंडू सदलगे, सचिव सुधीर नंजन्नवर आणि कोषाध्यक्ष नितीन जानवर यांच्या मार्गदर्शनाखाली हे आंदोलन करण्यात आले. जिल्हाधिकारी मोहम्मद रोशन यांच्यामार्फत मुख्यमंत्र्यांकडे प्रमुख मागण्यांचे निवेदन पाठवण्यात आले. ऑनलाईन औषध विक्रीमुळे तरुण पिढीवर होणारे दुष्परिणाम, नियमांचे उल्लंघन करून थेट होणारे औषध वितरण आणि कॉर्पोरेट कंपन्यांकडून दिल्या जाणाऱ्या सवलतींबद्दल फार्मसी मालकांनी तीव्र आक्षेप नोंदवला.

या आंदोलनात संघटनेचे उपाध्यक्ष पवन जे. देसाई, महेश बिळगी, अधिवक्ता महेशगौडा पाटील, संयुक्त सचिव शैलेंद्र जैन, सह-कोषाध्यक्ष महेश किल्लेदार, संघटक सचिव विनोद पी. कोलीवाड आणि सह-संघटक सचिव महेश अंगोलकर सहभागी झाले होते. त्यांच्यासोबत कायदेशीर सल्लागार भरतेश कुप्पानट्टी, संचालक जयवंत साळुंखे, सिद्धण्णा मुन्नोळी, विजय साणिकोप्प आणि प्रवक्ते क्रांती शानभाग व विक्रांत शानभाग यांच्यासह जिल्ह्यातील शेकडो औषध व्यापारी उपस्थित होते.

सरकारने नियमांमध्ये सुधारणा करून या व्यवसायाचे रक्षण न केल्यास, आगामी काळात जिल्ह्यातील सर्व रिटेल फार्मसीचे परवाने सामूहिकपणे सरकारला परत केले जातील, असा इशारा आंदोलनकर्त्यांनी दिला आहे.