हनीट्रॅपच्या जाळ्यात ओढून एका तरुणाचे अपहरण करणाऱ्या आणि बारा लाख रुपयांची खंडणी मागणाऱ्या टोळीचा गांधीचौक पोलिसांनी पर्दाफाश केला आहे. जमीन विक्रीतून कुटुंबाला मिळालेल्या पैशांची माहिती काढून हा गुन्हा करण्यात आला होता, या प्रकरणी एका महिलेसह आठ जणांना अटक करण्यात आली आहे.

विजापूर शहरातील कस्तुरी कॉलनी येथील रहिवासी साहिल चप्परबंद याच्या कुटुंबाने दोन महिन्यांपूर्वी आपली दोन एकर जमीन सव्वीस लाख रुपयांना विकली होती. ही माहिती साहिलसोबत शासकीय रुग्णालयात स्वयंपाक सहाय्यक म्हणून काम करणाऱ्या महम्मद रफीक नदाफ याला मिळाली होती. या पैशांची खंडणी वसूल करण्याच्या उद्देशाने त्याने आपल्या साथीदारांसह हनीट्रॅपचा कट रचला. या योजनेनुसार, शहरातील एका लॉजमध्ये राहणाऱ्या विजयलक्ष्मी नावाच्या महिलेच्या माध्यमातून साहिलला फोन करून भेटण्यासाठी बोलावण्यात आले.

भेटण्याच्या बहाण्याने १८ जून रोजी रात्री शासकीय रुग्णालयाच्या पाठीमागील मोकळ्या जागेत आलेल्या साहिलचे आरोपींनी स्कोडा वाहनातून अपहरण केले आणि त्याच्या कुटुंबाकडे बारा लाख रुपयांची मागणी केली. दुसऱ्या दिवशी साहिलच्या आईने गांधीचौक पोलीस ठाण्यात तक्रार दाखल केल्यानंतर विशेष तपास पथक स्थापन करण्यात आले. मोबाईल कॉल डिटेल्स आणि तांत्रिक पुराव्यांच्या आधारे पोलिसांनी तपास सुरू केला. तपासादरम्यान आरोपींचा माग काढत पोलिसांनी बेळगाव मधील घटप्रभा येथे कारवाई करून साहिलची सुरक्षित सुटका केली. या गुन्ह्यात सामील असलेले गोपाल मादर, दशरथ मादर, शिवानंद नंदिकोलोमठ, सुनील नावी, शिवकुमार होसट्टी, निंगप्पा नावडगी, महम्मद रफीक नदाफ आणि विजयलक्ष्मी तोनश्याळ या आठ आरोपींना अटक करून गुन्ह्यातील वाहन जप्त करण्यात आले आहे, अशी माहिती पोलीस अधीक्षक लक्ष्मण निंबरगी यांनी दिली.

हनीट्रॅप आणि अपहरणाचा हा गुंतागुंतीचा गुन्हा वेळेत उघडकीस आणल्याबद्दल गांधीचौक पोलीस ठाण्याच्या पथकाचे सर्वत्र कौतुक होत आहे.

विजयकुमार सारवाड, इन न्यूज, विजापूर