रिझर्व्ह बँक ऑफ इंडियाच्या नियमांचे उल्लंघन करून १० वर्षांपेक्षा जास्त काळ पदावर राहिलेल्या बेळगाव डीसीसी बँकेच्या ७ संचालकांना त्वरित अपात्र करावे, अन्यथा सरकारविरोधात कायदेशीर लढाई लढू, असा इशारा माहिती अधिकार कार्यकर्ते भीमप्पा गडाद यांनी दिला.

उत्तर कर्नाटक संघर्ष समितीचे अध्यक्ष भीमप्पा गडाद यांनी पत्रकार परिषदेत सांगितले की, आरबीआयच्या २०२६ च्या नियमांनुसार कोणत्याही जिल्हा मध्यवर्ती किंवा नागरी सहकारी बँकेत कोणीही सलग १० वर्षांपेक्षा जास्त काळ संचालक राहू शकत नाही. या नियमानुसार बेळगाव डीसीसी बँकेचे संचालक अण्णासाहेब जोल्ले, रमेश कत्ती, लक्ष्मण सवदी, अरविंद पाटील, महांतेश दोड्डगौडर, अप्पासाहेब कुलगुडे आणि नीलकंठ कप्पलगुद्दी यांना त्वरित अपात्र करण्याचे आदेश नाबार्डने सरकारला दिले आहेत.

आरबीआयच्या या सुधारित नियमावलीला कोणत्याही न्यायालयाने स्थगिती दिलेली नाही, अशी माहिती आरटीआयद्वारे मिळाली आहे. त्यामुळे सरकारने या संचालकांना तत्काळ पदमुक्त करावे, अन्यथा कोणत्याही राजकीय दबावाला बळी न पडता सरकारविरोधात न्यायालयात दाद मागू, असे भीमप्पा गडाद यांनी स्पष्ट केले.