श्री क्षेत्र धर्मस्थळ ग्रामविकास योजना बी.सी. ट्रस्ट, बेळगाव यांच्या वतीने मच्छे परिसरातील मार्कंडेयनगर येथे मोफत डोळे, हाडे आणि मधुमेह तपासणी शिबिराचे यशस्वी आयोजन करण्यात आले होते. सई दीप आय हॉस्पिटल आणि अद्विर मल्टिस्पेशालिटी हॉस्पिटल यांच्या संयुक्त विद्यमाने आयोजित या शिबिराचा शेकडो ग्रामीण नागरिकांनी लाभ घेतला.

श्री क्षेत्र धर्मस्थळ ग्रामविकास योजना बी.सी. ट्रस्ट बेळगाव-१ च्या मच्छे परिसरातील मार्कंडेयनगर येथील रेणुका देवी ज्ञानविकास केंद्राच्या अंतर्गत, नंदी मंदिर परिसरात हे शिबिर पार पडले. यामध्ये डोळे, हाडे, सांधे, रक्तदाब आणि मधुमेह यांची मोफत तपासणी करण्यात आली. कार्यक्रमाचे उद्घाटन स्थानिक मान्यवर सुरेश गवण्णावर, बसवराज धुळपण्णागोळ, लग्माण्णा माळंगी, फेडरेशनच्या अध्यक्षा लक्ष्मी, केंद्राच्या अध्यक्षा मंजुळा, तालुका प्रकल्प अधिकारी पार्वती, डॉ. आबिद अली, डॉ. पद्मराज, डॉ. विद्या, क्षेत्रीय पर्यवेक्षक मारुती आणि ज्ञानविकास समन्वयक दीपिका यांच्या उपस्थितीत दीपप्रज्वलनाने झाले. यावेळी बोलताना सुरेश गवण्णावर यांनी, डॉ. वीरेंद्र हेगडे यांनी गरिबांसाठी राबविलेल्या योजनांचा लाभ घेऊन महिलांनी स्वावलंबी बनण्याचे आवाहन केले.

प्रकल्प अधिकारी पार्वती यांनी वात्सल्य, सुज्ञा निधी शिष्यवृत्ती आणि आरोग्य रक्षा विमा योजनांबद्दल सविस्तर माहिती दिली. या आरोग्य शिबिरात एकूण १३८ ग्रामस्थांची मोफत वैद्यकीय तपासणी करण्यात आली. कार्यक्रमाचे स्वागत मारुती यांनी केले, सूत्रसंचालन दीपिका यांनी केले तर सेवा प्रतिनिधी दीपा यांनी उपस्थितांचे आभार मानले.