बेळगाव शहरात जातीय सलोख्याचे प्रतीक असलेला मोहरम सण हिंदू आणि मुस्लिम बांधवांनी अत्यंत श्रद्धेने साजरा केला. शहरातील ऐतिहासिक ‘पंजा मिलन’ कार्यक्रमात हजारो भाविकांनी एकत्र येत सामाजिक ऐक्याचा संदेश दिला.

मोहरम हा इस्लामिक दिनदर्शिकेचा पहिला महिना असून पैगंबर मोहम्मद यांचे नातू हजरत इमाम हुसेन यांनी कर्बलाच्या मैदानात न्याय आणि धर्माच्या रक्षणासाठी दिलेल्या बलिदानाचा हा स्मृती दिन आहे. उत्तर कर्नाटकात हिंदू आणि मुस्लिम बांधव एकत्र येऊन पंजे बसवतात आणि नवस फेडून हा सण साजरा करतात.

दरवर्षीप्रमाणे बेळगावच्या कॅम्प, रुक्मिणी नगर, गांधी नगर, अनगोळ, कणबर्गी, शहापूरसह विविध भागांतून सजवलेले पंजे दरबार गल्ली येथील जुम्मा मशिदीजवळ एकत्र आले. टोपी गल्लीतील मुख्य पंजाचे आगमन झाल्यानंतर सर्व पंजांचे मिलन झाले आणि त्यानंतर ते आपापल्या ठिकाणी परतले. या सोहळ्यात मार्केट आणि खंजर गल्लीतील ताबूतही सहभागी झाले होते. संध्याकाळी फोर्ट रोडवरून निघालेली मुख्य मिरवणूक किल्ला तलावापाशी पोहोचून संपन्न झाली.