“निवडणुका आल्या की देशाचा विकास बाजूला सारून धर्माला पुढे केले जाते. मात्र, सर्वसामान्य जनतेसाठी धर्मापेक्षा त्यांची उपजीविका, रोजगार आणि आर्थिक सुरक्षितता अधिक महत्त्वाची आहे,” असे प्रतिपादन सार्वजनिक बांधकाम व बेळगाव जिल्ह्याचे पालकमंत्री सतीश जारकीहोळी यांनी केले आहे.

बेळगाव ग्रामीण जिल्हा काँग्रेस महिला घटकाच्या नूतन अध्यक्षा म्हणून अश्विनी बेळवडी यांची निवड करण्यात आली आहे. शहरातील काँग्रेस भवनात आयोजित विशेष कार्यक्रमात पालकमंत्री सतीश जारकीहोळी यांच्या हस्ते नूतन ब्लॉक काँग्रेस अध्यक्ष आणि पदाधिकाऱ्यांना अधिकृत नियुक्तीपत्रे प्रदान करण्यात आली. आगामी ग्रामपंचायत, तालुका आणि जिल्हा पंचायत निवडणुकांच्या पार्श्वभूमीवर महिला संघटनेला तळागाळापासून मजबूत करण्यासाठी या बैठकीचे आयोजन करण्यात आले होते.

याप्रसंगी बोलताना मंत्र्यांनी, काँग्रेस पक्षाचा इतिहास, राज्य सरकारची कामगिरी आणि केंद्र सरकारचे अपयश घराघरांपर्यंत पोहोचवण्याचे आवाहन केले. मतदारसंघामध्ये ५० टक्के महिला मतदार असून त्यांना पक्षाकडे आकर्षित करण्यासाठी पदाधिकाऱ्यांनी सक्रियपणे काम करावे, अशा सूचना त्यांनी दिल्या. या कार्यक्रमाला पक्षाचे प्रमुख नेते आणि शेकडो महिला कार्यकर्त्या उपस्थित होत्या.