चिकोडी शहरातील प्रमुख मार्ग असलेल्या अंकली क्रॉस ते बी. के. कॉलेज दरम्यानच्या राष्ट्रीय महामार्गावर मोठ्या प्रमाणावर खड्डे पडल्याने वाहनधारकांना मनस्ताप सहन करावा लागत आहे. या रस्त्यावरून प्रवास करताना अपघाताचा धोका निर्माण झाला असून प्रशासनाकडून तातडीने डागडुजी करण्याची मागणी होत आहे.

अंकली क्रॉस ते बी. के. कॉलेज हा मार्ग चिकोडी शहरातील अत्यंत गजबजलेला रस्ता म्हणून ओळखला जातो. या मार्गावरून दररोज हजारो नागरिक आणि महाविद्यालयीन विद्यार्थी ये-जा करतात. मात्र, सध्या या महामार्गावर अनेक ठिकाणी मोठे खड्डे पडल्यामुळे चालकांना वाहने चालवताना मोठी कसरत करावी लागत आहे.

या दुरवस्थेमुळे स्थानिक नागरिक आणि प्रवाशांमधून तीव्र संताप व्यक्त केला जात आहे. रस्ता खराब असल्यामुळे नेहमी वाहतूक कोंडी होते आणि वाहनांचेही नुकसान होत आहे, असे चिकोडीचे रहिवासी चंद्रकांत हुक्केरी यांनी म्हटले.

रस्त्याच्या या दुरवस्थेकडे लक्ष वेधण्यासाठी स्थानिक नागरिक आणि लोकप्रतिनिधींनी राष्ट्रीय महामार्ग प्राधिकरणाच्या अधिकाऱ्यांशी संपर्क साधण्याचा प्रयत्न केला. मात्र, संबंधित अधिकाऱ्यांकडून या समस्येकडे दुर्लक्ष केले जात असून फोनवरूनही कोणताही प्रतिसाद मिळत नसल्याचा आरोप नागरिकांनी केला आहे. अधिकाऱ्यांच्या या भूमिकेमुळे स्थानिक पातळीवर नाराजी अधिक वाढली आहे.

महामार्गावरील खड्ड्यांची ही समस्या गंभीर रूप धारण करत असल्याने राष्ट्रीय महामार्ग प्राधिकरणाने याची त्वरित दखल घेणे गरजेचे आहे. अपघात टाळण्यासाठी आणि विद्यार्थ्यांची गैरसोय रोखण्यासाठी अंकली क्रॉस ते बी. के. कॉलेज दरम्यानच्या रस्त्याची तातडीने दुरुस्ती करून हा मार्ग सुरक्षित करावा, अशी मागणी आता जोर धरू लागली आहे.