मृत्यूनंतरही इतरांना जीवनदान देता येते, हे बेळगावमधील एका वृद्धेने सिद्ध केले आहे. आपल्या अंतिम इच्छेनुसार त्वचा आणि देहदान करून त्यांनी समाजासमोर एक आदर्श संदेश ठेवला आहे.

बेळगाव जिल्ह्यातील उल्लागड्डी खानापूर येथील रहिवासी असलेल्या ९१ वर्षीय अन्नपूर्णा शिवपुत्रय्या हिरेमठ यांचे निधन झाले. मृतदेहावर अंत्यसंस्कार न करता, त्यांच्या इच्छेनुसार बैलहोंगल येथील डॉ. रामण्णावर चॅरिटेबल ट्रस्टच्या वतीने त्यांचे पार्थिव हुबळी येथील केएलई जगद्गुरु गंगाधर महास्वामीजी मूरुसावीरमठ वैद्यकीय महाविद्यालयाकडे संशोधनासाठी सुपूर्द करण्यात आले.

यासोबतच, भाजलेल्या रुग्णांच्या तातडीच्या उपचारासाठी मृत अन्नपूर्णा यांची त्वचा बेळगावच्या केएलई डॉ. प्रभाकर कोरे रुग्णालयाच्या स्किन बँकेकडे सुपूर्द करण्यात आली आहे. हिरेमठ कुटुंबाच्या या मानवतावादी कार्याबद्दल डॉ. रामण्णावर ट्रस्टचे सचिव डॉ. महांतेश रामण्णावर यांनी कृतज्ञता व्यक्त केली आहे. मृत अन्नपूर्णा यांच्या पश्चात एक मुलगा आणि मोठा परिवार आहे.