बेळगावमधील केएलएस राजा लखमगौडा लॉ कॉलेजच्या एनएसएस युनिटच्या वतीने विद्यार्थ्यांमध्ये समाजसेवा आणि ग्रामीण विकासाविषयी जनजागृती निर्माण करण्यासाठी मरीहाळमध्ये विशेष राष्ट्रीय सेवा योजना (एनएसएस) शिबिराचे आयोजन करण्यात आले होते.

या कार्यक्रमाला मुख्य अतिथी म्हणून मरीहाळ ग्रामपंचायतीचे पीडीओ परशुराम मोल्लेन्नवर उपस्थित होते. एनएसएसच्या उपक्रमांमध्ये विद्यार्थ्यांचा सहभाग असणे अत्यंत महत्त्वाचे आहे, असे त्यांनी सांगितले.

कार्यक्रमाच्या अध्यक्षस्थानी कॉलेजचे प्राचार्य डॉ. ए. एच. हवालदार होते. आपल्या अध्यक्षीय भाषणात त्यांनी एनएसएस योजनेचा इतिहास आणि उद्दिष्टांवर प्रकाश टाकला.

हे शिबिर एनएसएस समन्वयक प्रा. सतीश अनिखिंडी यांच्या मार्गदर्शनाखाली आयोजित करण्यात आले होते. या शिबिरात एकूण ५० एनएसएस स्वयंसेवकांनी सहभागी होऊन विविध समाजोपयोगी उपक्रम राबवले. या शिबिराचा भाग म्हणून बेळगावमधील नंदादीप नेत्रालयाच्या सहकार्याने मोफत नेत्रतपासणी शिबिर घेण्यात आले. यामध्ये ६० हून अधिक ग्रामस्थांनी या सुविधेचा लाभ घेत वैद्यकीय तपासणी करून घेतली.