राष्ट्रीय निवडणूक आयोगाच्या मतदार यादी प्रक्रियेतील त्रुटींचा निषेध करण्यासाठी ‘एद्देळू कर्नाटक’ या सामाजिक संघटनांच्या आघाडीतर्फे बेळगावात जनजागृती सभा झाली. पात्र मतदारांची नावे वगळली जात असल्याच्या निषेधार्थ २० जून रोजी बंगळुरू येथे भव्य आंदोलन करण्याचा निर्णय यात घेण्यात आला.

निवडणूक आयोगाच्या कारभाराविरोधात ‘एद्देळू कर्नाटक’ आघाडीने राज्यव्यापी मोहीम सुरू केली असून, त्याअंतर्गत बेळगावच्या कन्नड साहित्य भवनात ही सभा झाली. यरगट्टी येथून आलेल्या जनजागृती जत्थ्याचे स्वागत करून आणि डॉ. बाबासाहेब आंबेडकर यांच्या पुतळ्याला अभिवादन करून सभेची सुरुवात झाली.

सभेतील वक्त्यांनी सांगितले की, अवैध स्थलांतरितांना हटवण्याच्या नावाखाली गरीब, दलित आणि आदिवासींची नावे मतदार यादीतून वगळली जात आहेत. आधार लिंकिंगचा गोंधळ आणि राजकीय हस्तक्षेपामुळे बंगळुरूमध्ये हजारो मतदारांची नावे गायब झाली आहेत. या त्रुटी सुधारण्यासाठी २० जून २०२६ रोजी बंगळुरूच्या फ्रीडम पार्क येथे भव्य निषेध सभेचे आयोजन करण्यात आले असून नागरिकांनी यात मोठ्या संख्येने सहभागी व्हावे, असे आवाहन करण्यात आले.

या प्रसंगी शिवलीला मिसाळे, इसाबेला झेवियर, यल्लाप्पा हिम्मडी, मंदा नेवगी, यासीनखान मकानदार आणि धार्मिक नेते आत्मानंद योग गुरुजी, फादर फॉस्टर अणकलगी, युसूफ खन्नी यांच्यासह अनेक प्रमुख वक्त्यांनी सभेला संबोधित केले. तसेच व्यासपीठावर रवी पाटील, आयना शेख, परप्पा कोटागी, निसार अहमद अवटी यांच्यासह जिल्ह्यातील इतर अनेक प्रमुख कार्यकर्ते उपस्थित होते.