चिक्कोडीमध्ये आयोजित कार्यक्रमात लोकसभा क्षेत्रातील दिव्यांग नागरिकांना साहित्याचे आणि शासकीय शाळांना स्मार्ट बोर्डचे वाटप करण्यात आले. खासदार प्रियांका जारकीहोळी, आमदार गणेश हुक्केरी आणि आंतरराष्ट्रीय दिव्यांग पोहपटू राघवेंद्र अन्वेकर यांच्या उपस्थितीत हा कार्यक्रम पार पडला.

दिव्यांग नागरिकांनी जीवनात कधीही खचून जाऊ नये, असे आवाहन खासदार प्रियांका जारकीहोळी यांनी केले. मंत्री सतीश जारकीहोळी यांच्या मार्गदर्शनाखाली क्षेत्रातील प्रत्येक गावातील दिव्यांग व्यक्तींपर्यंत सर्व सोयी-सुविधा पोहोचवण्याचे प्रामाणिक काम केले जाईल, अशी ग्वाही खासदार प्रियांका जारकीहोळी यांनी दिली. आंतरराष्ट्रीय दिव्यांग पोहपटू राघवेंद्र अन्वेकर यांचे यश सर्वांसाठी आदर्श असल्याचे सांगून आपण शिक्षण क्षेत्रालाही अधिक प्राधान्य देत असल्याचे खासदार प्रियांका जारकीहोळी यांनी स्पष्ट केले.

जारकीहोळी आणि हुक्केरी कुटुंबे सामान्य जनता, महिला आणि शेतकऱ्यांच्या सर्वांगीण विकासासाठी कार्यरत असल्याचे आमदार गणेश हुक्केरी यांनी सांगितले. दिव्यांग नागरिकांनी शासकीय योजनांचा सदुपयोग करून आर्थिकदृष्ट्या सक्षम व्हावे, असे आवाहन आंतरराष्ट्रीय पोहपटू राघवेंद्र अन्वेकर यांनी केले.

कार्यक्रमाचे स्वागत बुडा अध्यक्ष लक्ष्मणराव चिंगळे यांनी केले. या प्रसंगी महावीर मोहिते, सुप्रिया दत्ता पाटील, प्रभाकर कोरे, इरफान बेपारी, अर्जुन नायकवाडी, निर्मला पाटील आणि क्षेत्र शिक्षणाधिकारी प्रभावती पाटील यांच्यासह इतर मान्यवर उपस्थित होते.