जागतिक आरोग्य क्षेत्रात परिचारिकांचे योगदान अतुलनीय असून त्यांच्या सेवेची जग कृतज्ञतेने दखल घेते, असे प्रतिपादन एक्सलंट कॉलेज ऑफ नर्सिंगचे अध्यक्ष संगमेश बबलेश्वर यांनी एक्सलंट कॉलेज ऑफ नर्सिंगमध्ये आयोजित जागतिक परिचारिका दिनाच्या उद्घाटनप्रसंगी केले.

निस्वार्थी सेवेद्वारे जगाचे लक्ष वेधून घेणाऱ्या फ्लोरेन्स नाईटिंगेल यांच्या जन्मदिनानिमित्त दरवर्षी १२ मे रोजी हा दिवस साजरा केला जातो. कोरोना काळात परिचारिकांनी केलेल्या कामामुळे त्यांची सेवा सदैव स्मरणात राहील, असे मत त्यांनी व्यक्त केले.

या कार्यक्रमाला प्रमुख पाहुण्या म्हणून शासकीय नर्सिंग कॉलेजच्या निवृत्त प्राचार्य डॉ. प्रभावती काळे उपस्थित होत्या. एक्सलंट नर्सिंग कॉलेज विद्यार्थ्यांना दर्जेदार व सुसंस्कृत शिक्षण देत असून विद्यार्थ्यांनी याचा लाभ घ्यावा आणि जीवनात शिस्त अंगीकारावी, अशी प्रतिक्रिया डॉ. प्रभावती काळे यांनी दिली.

या प्रसंगी आयोजित विविध स्पर्धांमधील विजेत्या विद्यार्थ्यांना पारितोषिक वितरण करण्यात आले. कार्यक्रमाच्या अध्यक्षस्थानी प्राचार्य श्वेता बिरादार होत्या. तसेच राजकुमार तिडुगुंदी, प्रियांका मडगी, संतोषी निक्कम, विश्वनाथ कुलकर्णी यांच्यासह इतर प्राध्यापक व विद्यार्थी उपस्थित होते. या निमित्ताने विद्यार्थ्यांनी परिचारिकांच्या त्यागाचा संदेश देणारी आकर्षक रांगोळी रेखाटली होती, तसेच विविध सांस्कृतिक कार्यक्रम सादर केले.