बेळगाव महानगरपालिकेच्या सर्वसाधारण सभेत केंद्र सरकारच्या महिला आरक्षण धोरणावरून सत्ताधारी भाजप आणि विरोधी पक्ष काँग्रेसच्या नगरसेवकांमध्ये तीव्र शाब्दिक चकमक उडाली. या वादाचे रूपांतर गोंधळात झाल्याने सभागृहाचे वातावरण काही काळ तापले होते.

महानगरपालिकेचे नामनिर्देशित नगरसेवक दिनेश नाशिपुडी यांनी चर्चेला सुरुवात करताना केंद्र सरकारच्या भूमिकेवर टीका केली. देशात पहिल्यांदा महिला आरक्षण काँग्रेसनेच आणले असून, सुरुवातीला भाजपनेच याला विरोध केला होता, असा दावा दिनेश नाशिपुडी यांनी केला. तसेच केंद्र सरकार मतदारसंघ पुनर्रचनेचे कारण पुढे करून महिला आरक्षणाबाबत राजकारण करत असल्याचा आरोपही दिनेश नाशिपुडी यांनी केला.

या विधानानंतर सत्ताधारी भाजप नगरसेवक आक्रमक झाले आणि त्यांनी दिनेश नाशिपुडी यांच्या आरोपांचा तीव्र निषेध केला. काँग्रेसची भूमिका नेहमीच महिलाविरोधी राहिली आहे, असा पलटवार भाजप नगरसेवकांनी केला. दोन्ही बाजूंच्या नगरसेवकांनी एकमेकांवर आरोप-प्रत्यारोप केल्यामुळे सभागृहात मोठा गदारोळ निर्माण झाला.

सभागृहातील गोंधळ थांबत नसल्याचे पाहून आणि परिस्थिती हाताबाहेर जात असल्याचे लक्षात येताच, महापौर प्रीती कामतकर यांनी महानगरपालिकेचे कामकाज १० मिनिटांसाठी तहकूब केले.