बेळगावमधील केएलएस गोगटे इन्स्टिट्यूट ऑफ टेक्नॉलॉजीच्या यजमानपदाखाली पार पडलेल्या व्हिटियु विभागीय क्रिकेट स्पर्धेत जैन इंजिनिअरिंग कॉलेजने यश संपादन केले आहे. पाच दिवस चाललेल्या या स्पर्धेच्या अंतिम सामन्यात जैन कॉलेजच्या संघाने विजेतेपदावर आपले नाव कोरले.

२१ ते २५ एप्रिल दरम्यान आयोजित या स्पर्धेत बेळगाव विभागातील विविध महाविद्यालयांच्या संघांनी सहभाग नोंदवला होता. स्पर्धेच्या सांगता समारंभात डॉ. एम. एस. पाटील यांच्या हस्ते विजेत्यांना करंडक प्रदान करण्यात आला. जैन इंजिनिअरिंग कॉलेजने चॅम्पियन ठरण्याचा मान मिळवला, तर यजमान जीआयटी संघाला उपविजेतेपद मिळाले. यावेळी डॉ. जॉर्ज रॉड्रिग्स आणि मुरलीधर अष्टेकर यांच्यासह इतर मान्यवर उपस्थित होते.

जैन कॉलेजच्या अक्षय याला उत्कृष्ट कामगिरीबद्दल ‘सामनावीर’ आणि ‘सर्वोत्कृष्ट गोलंदाज’ म्हणून गौरवण्यात आले. जीआयटी कॉलेजच्या यश हवलानचे याने ‘मालिकावीर’ पुरस्कारावर आपली मोहोर उमटवली. याशिवाय आदित्य गौरण्णा याला सर्वोत्कृष्ट फलंदाज आणि विशाल याला सर्वोत्कृष्ट क्षेत्ररक्षक म्हणून सन्मानित करण्यात आले. .

शारीरिक शिक्षण संचालक डॉ. जॉर्ज रॉड्रिग्स आणि त्यांच्या टीमने या स्पर्धेचे नेटके नियोजन केले होते. सहभागी खेळाडूंच्या कौशल्याचे आणि सांघिक जिद्दीचे उपस्थित मान्यवरांनी विशेष कौतुक केले.