हे गाव ऐतिहासिक असले तरी, आज ते स्वच्छतेच्या अभावामुळे चर्चेत आले आहे. या ठिकाणी अनेक उद्योग आणि आंतरराष्ट्रीय हॉटेल्स उभे राहिले असले तरी, गावाच्या प्रवेशद्वारावरच अस्वच्छतेचे तांडव सुरू असल्याने नागरिकांमध्ये तीव्र नाराजी पसरली आहे.

बेळगाव तालुक्यातील काकती हे एक प्रसिद्ध गाव आहे. राणी चन्नम्मा यांचे हे जन्मगाव आहे, हे सर्वांना माहीत आहे. या गावाच्या प्रवेशाजवळ अनेक कारखाने आणि पंचतारांकित हॉटेल्स उभी राहिली आहेत. याच मार्गावरून राष्ट्रीय महामार्ग जातो आणि येथे उड्डाणपूल देखील आहेत. मात्र, काही नागरिक या ठिकाणचे पावित्र्य राखत नाहीत. या उड्डाणपुलाच्या आसपास मिनी कचरा डेपो तयार झाले आहेत. येथे असलेल्या आंतरराष्ट्रीय दर्जाच्या प्रतिष्ठित पंचतारांकित हॉटेल्सकडे जाणाऱ्या मुख्य उड्डाणपुलाजवळील सर्व्हिस रोडवर कचऱ्याचे मोठे ढीग साचले असून, प्रचंड दुर्गंधी पसरली आहे.

यामुळे पर्यावरणाचे प्रदूषण होत असून गावाच्या सौंदर्याला बाधा पोहोचत आहे. या समस्येकडे ग्रामपंचायतने अजूनही गांभीर्याने लक्ष का दिले नाही, असा प्रश्न नागरिक विचारत आहेत. पर्यटकांना आकर्षित करणाऱ्या अशा ठिकाणी स्वच्छता राखणे हे ग्रामपंचायतीचे पहिले कर्तव्य आहे. ग्रामपंचायत अधिकाऱ्यांनी तातडीने घटनास्थळी भेट देऊन कचऱ्याची विल्हेवाट लावावी, तसेच येथे कोणीही कचरा फेकणार नाही याची सुनिश्चिती करण्यासाठी योग्य ती कारवाई करावी, अशी मागणी स्थानिक नागरिक आणि पर्यटकांनी केली आहे.