अयोध्येतील राममंदिराच्या उद्घाटनानिमित्त उद्या 22 जानेवारी रोजी चिकोडी-सदलगा आमदार गणेश हुक्केरी यांच्या नेतृत्वाखाली एकसंबा हनुमान मंदिर ते तोरणहळ्ळी हनुमान मंदिरापर्यंत भव्य पदयात्रा काढण्यात येणार आहे, अशी माहिती एकसंबा नगरपंचायत सदस्य सुनील सप्तसागरे यांनी दिली.

चिक्कोडी तालुक्‍यातील एकसंबा येथे पत्रकार परिषदेत बोलताना सुनील सप्तसागरे म्हणाले की, ही 25 किलोमीटरची पदयात्रा आहे. सोमवारी सकाळी 6 वाजता एकसंबा शहरातील हनुमान मंदिरापासून या पदयात्रेला सुरुवात होणार आहे. चिक्कोडीहून येणाऱ्या भाविकांनी पर्यटन मंदिराजवळ उपस्थित राहावे. सकाळी 7.30 वा. या पदयात्रेत 5 हजारांहून अधिक लोक सहभागी होण्याची अपेक्षा त्यांनी व्यक्त केली.
या दिवशी आमदार प्रकाश हुक्केरी आणि आमदार गणेश हुक्केरी यांच्या प्रयत्नातून तोरणहळ्ळी हनुमान मंदिराच्या जीर्णोद्धारासाठी 25 लाख रुपये मंजूर करण्यात आले असून, या कामाचा शुभारंभ होणार आहे. तसेच येणाऱ्या 25 हजार भाविकांसाठी तोरणहल्ली हनुमान मंदिर येथे महाप्रसादाची व्यवस्था करण्यात आली आहे.

पत्रकार परिषदेत उमेश सतवार, चिदानंद बेल्ली, किरण माळी, रवी माने, अंकुश खोत, जमनाश मकानदार, अरुण मगदूम, महादेव माळगे, पंकज पवार, अण्णासाहेब रांगोळे, रवी खोत, विनोद चितळे आदी उपस्थित होते.