पत्नीला मारण्यासाठी देशी पिस्तुल विकत घेणारा नवरोबा पोलिसांचा पाहुणा बनल्याची घटना बेळगाव जिल्ह्यात घडली आहे.

15 दिवसांपूर्वी पत्नीला घटस्फोट दिल्यानंतर तिच्या हत्येचा कट रचणारा पती पोलिसांच्या जाळ्यात आला आहे. पत्नीचे दुसऱ्याशी संबंध असल्याचा संशय व्यक्त करून तिला मारण्याचा कट रचणाऱ्या सचिन बाबासाहेब रायमाने याला पोलिसांनी अटक केली आहे.

सांगली जिल्ह्यातील मिरज तालुक्यातील कुपवाड येथून पिस्तूल खरेदी केल्यानंतर सचिन मिरज रेल्वे स्थानकावर संशयास्पदरीत्या फिरत होता. त्याच्याबाबत संशय आल्याने सचिनची चौकशी केली असता सचिन चिक्कोडी तालुक्यातील रहिवासी असून त्याने पिस्तूल खरेदी केल्याचे कबूल केले. त्यामुळे मिरज पोलिसांनी त्याला अटक केली आहे.

दरम्यान, सचिनची पत्नी हर्षिता हिनेही चिक्कोडी पोलिसात फिर्याद देऊन तिच्या संरक्षणाची मागणी केली आहे. तिच्या जीवाचे काही बरेवाईट झाल्यास त्याची जबाबदारी पती सचिनवर असल्याची तक्रार दाखल करण्यात आली आहे.

हर्षिताने सांगितले की, गेल्या 7 वर्षांपासून तो तिला वारंवार त्रास देत आहे. माझा पती मला जीवे मारण्याची धमकी देत ​​आहे. याबाबत मी यापूर्वीच पोलिस ठाण्यात तक्रार दाखल केली आहे असे तिने म्हटले आहे.