बागलकोट जिल्ह्यातील मुधोळ येथे उसाला योग्य दर मिळावा, या मागणीसाठी शेतकऱ्यांनी आजपासून तीव्र आंदोलन सुरू केले आहे. सरकारने जाहीर केलेला प्रतिटन ३६०० रुपयांचा दर अमान्य करत शेतकऱ्यांनी ४२५० रुपयांची मागणी केली आहे.

सांगोळी रायण्णा चौकात हजारो शेतकरी एकत्र येऊन धरणे आंदोलन करत आहेत. ९० टक्के शेतकऱ्यांनी सरकारचा निर्णय मान्य केल्याच्या मंत्र्यांच्या वक्तव्यालाही शेतकरी नेत्यांनी प्रत्युत्तर दिले आहे. मंत्र्यांच्या बैठकीतील निर्णय मान्य नसल्याचे स्पष्ट करत आंदोलन सुरू ठेवण्याचा निर्धार त्यांनी व्यक्त केला.

ऊसतोडणी आणि वाहतुकीचा खर्च वाढल्याने सध्याचा दर परवडत नसल्याचे शेतकऱ्यांचे म्हणणे आहे. साखर कारखान्यांकडून शेतकऱ्यांचे शोषण होत असल्याचा आरोपही त्यांनी केला. योग्य दर मिळेपर्यंत आंदोलन मागे घेणार नसून, राज्यातील सर्व जिल्ह्यांतील शेतकऱ्यांनी या लढ्यात सहभागी व्हावे, असे आवाहन शेतकरी नेत्यांनी केले आहे. मागण्या मान्य न झाल्यास आंदोलन अधिक तीव्र करण्याचा इशाराही देण्यात आला आहे.