विजापूर जिल्हा दुष्काळग्रस्त जाहीर करून शेतकऱ्यांना तातडीने भरपाई देण्यात यावी, अशी जोरदार मागणी भाजप शेतकरी मोर्चाचे राज्य अध्यक्ष तथा माजी आमदार ए. एस. पाटील नडहळ्ळी यांनी केली आहे.

जिल्ह्यातील इंडि आणि चडचण तालुके अद्याप दुष्काळग्रस्त घोषित करण्यात आलेले नाहीत. या भागातील लिंबू उत्पादक शेतकरी मोठ्या अडचणीत सापडले असून सरकार त्यांच्या समस्येकडे दुर्लक्ष करत असल्याचा आरोप नडहळ्ळी यांनी केला. लोकप्रतिनिधींनी या प्रश्नावर सरकारच्या विरोधात आवाज उठवावा, असे ते म्हणाले.

द्राक्ष, लिंबू आणि केळी या बहुवार्षिक पिकांचे तीव्र नुकसान झाले असून यासाठी विशेष पाहणी करून नुकसान नोंदवण्याची गरज त्यांनी व्यक्त केली. शेतकऱ्यांना मोफत पाणी, चारा आणि वीज देण्यासोबतच प्रतिएकरी ५० हजार रुपयांची भरपाई देऊन पीककर्ज माफ करण्याची मागणी त्यांनी केली.

राज्याच्या तिजोरीत निधीची कमतरता नसून उधळपट्टी थांबवून सरकारने शेतकऱ्यांना मदत करावी. तसेच केंद्र सरकारकडे सर्वपक्षीय शिष्टमंडळ नेऊन दुष्काळ भरपाईची मागणी करावी, असे ए. एस. पाटील नडहळ्ळी यांनी म्हटले.

शासनाने योग्य पावले उचलली नाहीत तर राज्यभर आंदोलन उभारले जाईल, असा इशारा त्यांनी दिला. या पत्रकार परिषदेला खासदार रमेश जिगजिणगी, महापौर एम. एस. करडी, माजी आमदार रमेश भुसनूर, नेते उमेश कारजोळ, विजूगौडा पाटील उपस्थित होते.