विजापूर जिल्ह्यात मान्सूनचा पाऊस न झाल्याने भीषण दुष्काळसदृश परिस्थिती निर्माण झाली असून पेरलेली बियाणे पावसाअभावी वाया जाण्याची भीती व्यक्त होत आहे.

जिल्ह्यात पावसात मोठी घट नोंदवली गेली आहे. हजारो रुपये खर्च करून पेरणी केलेले शेतकरी आता पावसाच्या प्रतीक्षेत आहेत. जिल्ह्यात बहुतांश शेती क्षेत्रावर पेरणी झाली असली तरी पाऊस नसल्याने बियाणे उगवलेले नाहीत.

महाराष्ट्रातील पश्चिम घाट क्षेत्रात झालेल्या जोरदार पावसामुळे आलमट्टी धरण भरण्याच्या मार्गावर आहे. काही दिवसांपूर्वी रिकामे असलेले हे धरण पूर्ण भरत आल्याने शेतकऱ्यांना दिलासा मिळाला आहे.

सध्या पिके वाचवण्यासाठी आलमट्टी धरणातून कालव्याद्वारे तातडीने पाणी सोडावे, अशी मागणी शेतकरी संघटना आणि स्थानिक शेतकऱ्यांकडून केली जात आहे.

परिस्थिती लक्षात घेता सरकारने जिल्ह्यात तातडीने मदत करावी, अशी अपेक्षा शेतकऱ्यांकडून व्यक्त केली जात आहे.

विजयकुमार सारवाड, इन न्यूज, विजापूर