विद्याभारती आणि अखिल भारतीय शिक्षा संस्थान यांच्या संयुक्त विद्यमाने आयोजित जिल्हास्तरीय क्रीडा स्पर्धेला बेळगाव येथील नेहरू क्रीडांगणावर उत्साहात सुरुवात झाली आहे.

या कार्यक्रमाच्या अध्यक्षस्थानी परमेश्वर जी. हेगडे होते. लैला शुगर्सचे व्यवस्थापकीय संचालक सदानंद पाटील आणि आंतरराष्ट्रीय ज्युडोपटू रोहिणी पाटील यांनी क्रीडा ज्योत पेटवून आणि हवेत फुगे सोडून या स्पर्धेचे उद्घाटन केले. यावेळी मुख्य अतिथी सदानंद पाटील यांनी, क्रीडामुळे विद्यार्थ्यांमध्ये शिस्त आणि सांघिक भावना निर्माण होते, त्यामुळे खेळाडूंनी या सुवर्णसंधीचा लाभ घेऊन राज्य व राष्ट्रीय पातळीवर स्वतःची ओळख निर्माण करावी, असे आवाहन केले. या सोहळ्यात एकलव्य पुरस्कार विजेत्या रोहिणी पाटील यांनी क्रीडा क्षेत्रातील संधींविषयी खेळाडूंना मार्गदर्शन केले. मंचावर अशोक जी. शिंत्रे, माधव जी. पुणेकर यांच्यासह विद्याभारती संस्थेचे वरिष्ठ अधिकारी उपस्थित होते. उद्घाटनानंतर नेहरू क्रीडांगणावर विविध धावण्याच्या आणि मैदानी स्पर्धांना प्रारंभ झाला.