दक्षिण भारतातील कोट्यवधी शेतकऱ्यांची जीवनवाहिनी असलेल्या विजयनगर जिल्ह्यातील होसपेटजवळील तुंगभद्रा धरणाच्या नूतनीकरण करण्यात आलेल्या नवीन क्रस्ट गेट्सचे मान्यवरांच्या हस्ते अधिकृत लोकार्पण करण्यात आले असून, यामुळे धरण परिसरात उत्सवाचे वातावरण निर्माण झाले होते.

तुंगभद्रा धरणाच्या नवीन ३३ क्रस्ट गेट्सच्या स्टील वेचे आज रिमोटचे बटण दाबून यशस्वी लोकार्पण करण्यात आले. या ऐतिहासिक सोहळ्याला कर्नाटकचे मुख्यमंत्री डी. के. शिवकुमार, आंध्र प्रदेशचे मुख्यमंत्री एन. चंद्राबाबू नायडू, तेलंगणाचे मुख्यमंत्री ए. रेवंत रेड्डी आणि केंद्रीय जलशक्ती मंत्री सी. आर. पाटील यांनी एकत्र उपस्थिती लावली होती. या सर्व मान्यवरांनी धरणाचे १८, १९, २० आणि २१ क्रमांकाचे गेट एकाच वेळी उघडून या प्रकल्पाचे उद्घाटन केले.

गेटच्या लोकार्पण सोहळ्यापूर्वी मुख्यमंत्री डी. के. शिवकुमार यांनी त्यांचे आराध्य दैवत श्री गंगाधर अज्जय्या स्वामी यांच्या प्रतिमेचे विशेष पूजन केले. धरणाच्या गेट दुरुस्तीचे काम कोणत्याही अडथळ्याविना यशस्वीरीत्या पूर्ण झाल्याबद्दल हा धार्मिक विधी पार पडला. कोपळ जिल्ह्यातील मुनिराबाद येथे आयोजित भव्य मेळाव्याच्या मुख्य व्यासपीठावरही स्वामीजींची प्रतिमा बसवण्यात आली होती.

व्हीव्हीआयपी नेत्यांच्या दौऱ्याच्या पार्श्वभूमीवर विजयनगर जिल्हा प्रशासन आणि टी.बी. डॅम व्यवस्थापन मंडळाने चोख पोलीस बंदोबस्त तैनात केला होता. कडक पास तपासणीनंतरच सर्वांना प्रवेश दिला जात होता. सर्व मान्यवरांनी बॅटरीवर चालणाऱ्या वाहनातून गेट्सजवळ जाऊन पाहणी केली.

उद्घाटन सोहळ्यासाठी संपूर्ण धरण परिसर तिरंगी कापड, केळीचे खांब आणि झेंडूच्या फुलांच्या तोरणांनी एखाद्या नववधूसारखा सजवण्यात आला होता. मुख्य प्रवेशद्वारावर गणेशाची मूर्ती ठेवून विशेष पूजा करण्यात आली, तसेच सुमारे दोन किलोमीटरपर्यंत विद्युत रोषणाई करण्यात आली होती. या उद्घाटन सोहळ्यानंतर सर्व मान्यवर, राज्यातील मंत्री, आमदार आणि खासदारांसह मुनिराबाद येथे आयोजित मुख्य व्यासपीठावरील भव्य कार्यक्रमात सहभागी झाले.