जैनापूर येथील अरिहंत शुगर कारखान्याच्या आठव्या वर्षाच्या ऊस गळीत हंगामाचा शुभारंभ करण्यात आला.

उत्तम पाटील यांनी जैनापूर येथील अरिहंत शुगर कारखान्याच्या ८ व्या गळीत हंगामाच्या शुभारंभात बोलताना, दिवंगत रावसाहेब पाटील यांचे आशीर्वाद व बंधू अभिनंदन यांच्या सहकार्यामुळे कारखान्याचा ८ वर्षांत विस्तार झाला असून, परिसराच्या विकासाला चालना मिळाल्याचे स्पष्ट केले. यावेळी त्यांनी यंदा ६ लाख मेट्रिक टन ऊस गाळपाचे उद्दिष्ट असल्याचे जाहीर केले. कारखान्याने नेहमीच एफआरपीपेक्षा अधिक दर दिला असून, यावर्षीही तो दर देण्यास आपण कटिबद्ध आहोत. त्यामुळे शेतकऱ्यांनी जास्तीत जास्त ऊस कारखान्याला पुरवावा, असे आवाहन त्यांनी केले.

यावर्षी जैनापूर कारखान्याची गाळप क्षमता वाढवण्यात आली आहे. सध्या केवळ साखर उत्पादन सुरू असले तरी, इतर कारखान्यांच्या बरोबरीने ऊसाला दर दिला जात आहे. निपाणी, चिक्कोडी, हुक्केरी तालुके हे कारखान्याचे गाळप क्षेत्र आहे. वजनातील पारदर्शकता आणि विश्वासार्ह दरांमुळे कारखान्याने अल्पावधीतच शेतकऱ्यांचा विश्वास जिंकला आहे. ऊस दरासाठी झालेल्या आंदोलनामुळे हंगाम सुरू होण्यास विलंब झाला असला तरी, दर निश्चित होताच गाळप त्वरित सुरू करण्याची तयारी पूर्ण झाली असल्याचे त्यांनी सांगितले.

प्रारंभी, कारखान्याचे सीईओ महावीर पाटील आणि त्यांच्या पत्नी यांनी पूजाविधी केले. वैष्णवी पाटील यांनी वजन काट्याची पूजा केली. त्यानंतर पाटील कुटुंबीय आणि मान्यवरांनी ऊस यंत्रात टाकून हंगामाचा शुभारंभ केला.

यावेळी अरिहंत शुगरचे कार्यकारी संचालक अभिनंदन पाटील, मीनाक्षी पाटील, माजी मंत्री वीरकुमार पाटील, माजी आमदार सुभाष जोशी, संजय शिंत्रे, हुक्केरी तालुका विद्युत सहकारी संघाचे अध्यक्ष महावीर नीलजगी, दक्षिण भारत जैन सभेचे अध्यक्ष भालचंद्र पाटील, चिदानंद कोरे, कारखान्याचे संचालक संदीप पाटील, महावीर आप्पा पाटील, महावीर पाटील, चौगुले, दिग्विजय पाटील, चिक्कोडीचे शाम रेवडे, रामा माने, रवी माळी, सुनील पाटील, राजू पाटील, निपाणी शहर नियोजन समितीचे अध्यक्ष निकू पाटील, जिल्हा परिषदेचे माजी सदस्य चेतन स्वामी, अमर स्वामी, केदार कुलकर्णी, राकेश चिंचणे, बोरगावचे महापौर पिंटू कांबळे यांच्यासह सर्व पदाधिकारी उपस्थित होते.